Samningur í hendi fyrir álver Norðuráls

Landsvirkjun og Norðurál Grundartangi ehf. hafa náð samkomulagi um að endurnýja raforkusamning fyrirtækjanna fyrir 161 MW. Samningurinn felur í sér nokkur nýmæli en orkuverð verður tengt markaðsverðum í Norður Evrópu – í gegnum Nord Pool raforkumarkaðinn – og kemur það í stað álverðs­tengingar í gildandi samningi.

Samningurinn er til fjögurra ára og uppfyllir nærri þriðjung af orkuþörf álvers Norðuráls á Grundartanga. Endurnýjaður samningur tekur gildi í nóvember 2019 og gildir til loka árs 2023. Núgildandi samningur verður áfram í gildi til loka október 2019.

Hörður Arnarson, forstjóri Landsvirkjunar, segir að samningurinn sé afrakstur mikillar vinnu, en fyrr í vetur kom fram í fréttum að hart var tekist á milli fyrirtækjanna um innihald samningsins, sem eðli málsins samkvæmt gerðu bæði sitt ítrasta til að verja sína hagsmuni.

„Það eru miklir hagsmunir undir, og við þurftum að gæta hagsmuna okkar eigenda og þeir sinna. Það var hart tekist á en menn náðu góðri lendingu,“ segir Hörður en bætir við að nýr samningur sé gjörbreyttur frá þeim fyrri. Sá samningur hafi verið barn síns tíma en hann er frá árinu 1997.

„Þess vegna þurfti að gera veigamiklar breytingar á samningnum, með því að fella niður álverstenginguna og tengja raforkuverðið mörkuðum sem hefur verið stefnt að lengi.“

Hörður segir að tenging raforkusamnings beint við markað séu viss vatnaskil, og eigi sér ekki fordæmi hérlendis. Landsvirkjun hafi stefnt að þessum áfanga í mörg ár, og slík tenging hafi átt sér sína efasemdarmenn hérlendis. Hins vegar sé nú staðfest að Landsvirkjun sé að vinna á sama markaði og önnur orkufyrirtæki í Evrópu.

Samningurinn er til fjögurra ára eins og áður sagði, sem er stuttur tími samanborið við marga eldri samninga íslenskra orkufyrirtækja.

„Þetta er hefðbundið í Evrópu, en svo er einfaldlega stefnt á að semja að nýju. Sú vinna hefst löngu áður en þessi nýi samningur rennur út,“ segir Hörður og bætir við að árið 2009 voru 65% tekjuflokka Landsvirkjunar tengd álverði en nú er það aðeins um tuttugu prósent sem sé nálægt því að vera ásættanleg áhætta er varðar sölu á orku fyrirtækisins.

„Miðað við okkar forsendur er um umtalsverða verðhækkun að ræða. Það ræðst svo af orku- og álmörkuðum á næstu árum hve mikil hún verður,“ segir Hörður. 

Fréttin birtist fyrst í Fréttablaðinu 14. maí