Dr.Gabor Maté á leið til landsins

„Ég er búinn að vera aðdáandi Gabors í langan tíma,“ segir Máni Hrafnsson sem stendur fyrir komu kanadíska læknisins og fræðimannsins Dr. Gabor Maté til landsins í næsta mánuði. Gabor heldur þrjá fyrirlestra í Hörpu þann 12. júní næstkomandi.

Gabor er þekktur fyrir óhefðbundnar aðferðir í meðferðarúrræðum fyrir langt leidda fíkla auk þess sem hann er þekktur fyrir athuganir sínar á athyglisbresti, þroska og hegðun barna og orsökum og meðferð streitu. Einnig hafa vakið athygli skoðanir hans á beinum tengslum sálrænnan og líkamlegrar heilsu.

Gabor starfaði um árabil í East Hastings í Vancouver, með langt leiddum fíklum og fólki með geðraskanir. Aðferðir Gabor hafa vakið mikla athygli þar sem hann þótti ná áður óþekktum árangri með aðferðum sínum. „Í staðinn fyrir að líta á fíkn sem sjúkdóm, hugsar hann frekar um fíkn sem afleiðingu af sjúkdómi, og reynir þar að leiðandi að komast að rót vandans,“ segir Máni um Gabor.

„Ég kynntist honum fyrst þegar ég las bókina In the Realm of the Hungry Ghost þar sem hann fjallar um starf sitt sem læknir með langt leiddum fíklum sem höfðust við hina alræmdu götu East-Hastings í Vancouver, Kanada. Eftir það leitaði ég uppi það sem til er af skrifum hans og fyrirlestrum á hinum ýmsu netmiðlum,“ segir Máni. Hann segir sýn Gabors á fíkn hafa heillað.

„Eins og svo margir aðrir á ég fólk sem stendur mér mjög nærri sem hafa verið að berjast við alkólisma meira eða minna alla sína ævi. Það eru til þeir sem fara í meðferð og ná að rétta úr kútnum, á meðan allt of margir falla aftur og aftur. Ég varð heillaður af kenningum Gabors um hvað það er sem veldur fíkn, og hvernig má best meðhöndla hana,“ segir Máni.

Gabor er eftirsóttur fyrirlesari og hafði Máni mikið fyrir því að ná sambandi við hann. „Undanfarin ár hefur Gabor tileinkað tímanum sínum alfarið í að skrifa bækur og halda fyrirlestra útum allan heim. Hann er bókaður tvö ár fram í tímann.Hann er hinsvegar hugsjónarmaður, og þegar mér tókst að hafa upp á honum í gegnum ýmsar krókaleiðir, og útskýra fyrir honum mikilvægi þess að koma til Íslands, þá sló hann til. Ég tel og vona, að Gabor geti haft langvarandi jákvæð áhrif á íslenskt samfélag. Ég vona að hann geti sannfært fólk um skynsamlelgri stefnu í fíkniefna og meðferðarmálum.“

Gabor er afkastamikill höfundur og hefur ritað nokkrar metsölubækur, sem komið hafa út á 20 tungumálum víða um heim. Einnig er hann annar tveggja stofnanda góðgerðarstofnunarinnar Compassion for Addiction, sem fæst við ávandabindingu, hefur hlotið Hubert Evans verðlaunin fyrir fagbókmenntir, er heiðursdoktor í lögum frá University of Northern British Columbia, hlaut mannúðarverðlaun Martin Luther King árið 2012 frá samtökunum Mothers Against Teen Violence og er dósent við afbrotafræðideild Simon Fraser háskóla í Vancouver.

Hægt er að nálgast nánari upplýsingar um viðburðinn hér.