N1 greiðir fyrrverandi forstjóra 87 milljónir

N1 gjaldfærði 87 milljónir króna á síðasta ári vegna launagreiðslna og hlunninda til Eggerts Benedikts Guðmundssonar, fyrrum forstjóra fyrirtækisins. Þetta kemur fram í nýútkomnum ársreikningi N1.

Eggerti var sagt upp í febrúar á síðasta ári en fær greitt sem samsvarar 5,8 milljónum króna á mánuði frá byrjun síðasta árs og út mars á þessu ári. Árið 2014 fékk Eggert 55 milljónir króna greiddar í laun og hlunnindi eða sem samsvarar 4,8 milljónum króna á mánuði.

N1 gaf út þegar Eggerti Benedikt var sagt upp að með uppsögninni væri verið að lækka kostnað við yfirstjórn félagsins. Fækka ætti framkvæmdastjórum um einn þar sem ekki ætti að ráða í stöðu framkvæmdastjóra markaðssviðs. Eggert Þór Kristófersson, sem starfaði sem fjármálastjóri fyrirtækisins, var ráðinn forstjóri í stað nafna síns. 

Launagreiðslur og hlunnindi N1 til stjórnarmanna og stjórnenda hækkuðu úr 163 milljónum í 237 milljónir króna milli ára eða um 45 prósent. Launagreiðslur til hins nýja forstjóra hækkuðu í 3,6 milljónir króna á mánuði úr 2,8 milljónum króna árið 2014, þegar Eggert Þór starfaði sem fjármálastjóri N1.

Hagnaður N1 jókst milli ára

Hagnaður N1 jókst milli ára og nam 1,8 milljörðum króna á síðasta ári miðað við 1,6 milljarða árið 2014. Í skýrslu stjórnar kemur fram að tekjur N1 hafi dregist saman um 14 prósent, og fallið úr 57 milljörðum króna í 49 milljarða króna. Ástæða tekjusamdráttarins er fyrst og fremst sögð vera lækkandi olíuverð sem hafi haft neikvæð áhrif á afkomu félagsins.

Stjórnin lagði til að greiddur yrði 1.050 milljónir í arð vegna starfsemi ársins 2015 eða sem samsvarar 3 krónum á hlut.

Arðsemi eiginfjár var 19,9 prósent en eigið fé N1 nemur 7,7 milljörðum króna. Eignir nema 18,8 milljörðum og skuldir 11,1 milljarði króna.