Bundnar vonir við nýtt bóluefni gegn HIV veirunni

„Eyðileggingarmáttur HIV veirunnar hefur haft gríðarlega áhrif innan Suður-Afríku en nú höfum við hafist handa við rannsóknir á nýju bóluefni sem miklar vonir eru bundnar við. Ef bóluefnið virkar myndi það breyta miklu í baráttunni gegn HIV faraldrinum.“ segir Dr.Glenda Grey yfirmaður suður-afrísku læknarannsóknarnefndarinnar. Guardian greinir frá.

Prufur og rannsóknir eru hafnar í Suður-Afríku á nýju bóluefni gegn HIV veirunni en þetta er í fyrsta skipti í sjö ár sem slíkar nýjar prófanir hafa verið framkvæmdar. Bóluefnið inniheldur einangraðan hluta veirunnar sem algengur er í Afríku. Þátttakendur munu fá fimm sprautur af bóluefninu ásamt þremur sprautum af ónæmisglæði sem hjálpar til við að virkja áhrif bóluefnisins. Miklar vonir eru bundnar við bóluefnið og talið er að ef vel gengur þá gæti það bundið enda á þann faraldur sem geysað hefur á þessum slóðum lengi vel.

Þrátt fyrir að minna sé um dauðsföll af völdum veirunnar, vegna lyfja sem bæla hana niður, þá hafa sérfræðingar ekki enn náð að koma í veg fyrir að fólk sýkist af veirunni. Tilfelli sýktra heldur áfram að hækka og telja sérfræðingar að bóluefni sé það eina sem geti hjálpað ástandinu og komið í veg fyrir frekari útbreiðslu sjúkdómsins.

Eldri rannsóknin umdeild

Bóluefnið er þróaðri útgáfa af eldra efni, RV144, sem talið var að hefði sýnt bestan árangur í prufu sem gerð var í Thailandi fyrir 7 árum síðan og sýndi 31 prósent virkni. Prufan var þó umdeild þar sem bóluefnið RV144, sem notast var við, var samblanda úr tveimur lyfjum AidsVax og ALVAC en þau voru þá búin að vera í notkun í 15 ár. AidsVax hafði þá ekki staðist prófanir eitt og sér.

Rannsóknin og prufan fyrir RV144, samblandaða bóluefninu, var stór og tóku um 16.400 manns sem ekki voru smitaðir af HIV veirunni þátt í henni. Þeim var annað hvort gefið virk útgáfa af bóluefninu eða lyfleysa. Þremur árum seinna kom niðurstaða prófunarinnar í ljós . Þá höfðu 125 manns orðið sýktir af veirunni. Þar af voru 51 einstaklingur sem höfðu fengið virkt bóluefni en 74 sem fengu lyfleysuna. Markhópurinn sem rannsakaður var í þetta skiptið var ekki talinn vera í jafn miklum áhættuhóp á að smitast af veirunni og hópurinn sem verið er að rannsaka nú.

Miklar vonir eru hins vegar bundnar við þetta nýja og þróaðra bólefni. Nú hafa 5400 manns á aldrinu 18-35 ára tekið þátt í rannsókninni og eru þau öll talin vera innan þess samfélagshóps sem er líklegastur til að smitast. Vonir eru bundnar við 50 til 60 prósent virkni.