Fjölmargir látnir í árás liðsmanna Boko Haram

Átta manns hið minnsta létust í árás fyrir utan kirkju í norðausturhluta Nígeríu í gær. Talið er að liðsmenn hryðjuverkasamtakanna Boko Haram beri ábyrgð á árásinni.

Árásin átti sér stað eftir guðsþjónustu í bænum Kwamjilari, nærri Chibok þar sem liðsmenn Boko Haram rændu rúmlega tvö hundruð skólastúlkum árið 2014.

„Nokkrir kirkjugesta urðu eftir fyrir utan kirkjuna þegar vopnaðir menn hófu þar skothríð,“ segir Luka Damina frá nágrannabænum Kautikeri, þangað sem margir flúðu eftir árásina.

Árásir liðsmanna Boko Haram hafa verið tíðar í norðurhluta Nígeríu síðustu árin. Í frétt SVT kemur fram að fyrir um mánuði hafi tíu manns fallið og þrettán verið rænt í árás liðsmanna Boko Haram.