Vill að þingrofsskjal Sigmundar Davíðs verði gert opinbert

Kristján L. Möller, þingmaður Samfylkingarinnar, hefur lagt fram fyrirspurn til Sigurðar Inga Jóhannssonar, forsætisráðherra, varðandi þingrofsskjal sem Sigmundur Davíð Gunnlaugsson, þáverandi forsætisráðherra, á að hafa farið með á Bessastaði þann 5. apríl síðastliðinn þegar hann fór á fund Ólafs Ragnars Grímssonar, forseta Íslands. Með Sigmundi í för voru embættismenn úr forsætisráðuneytinu.

Kristján spyr hvort að skjal um þingrof og nýjar kosningar sem undirbúið var í aðdraganda fundarins með forsetanum eða önnur gögn tengd sama fundi hafi verið skráð í málaskrá ráðuneytisins. Þá spyr hann jafnframt hvort að gögnin séu aðgengileg og þá hvar.

Í samtali við Vísi segist Kristján vonast til þess að skjalið verði birt sem svar við fyrirspurninni sem og önnur gögn sem tengjast því ef þau eru til.

Hann nefnir að í kjölfar hrunsins hafi það verið gagnrýnt mjög að ýmislegt hafi vantað upp á formfestu og rekjanleika skjala, fundargerða og minnisblaða ráðuneyta. Í því samhengi segist hann telja að umrætt skjal hefði tvímælalaust átt að fara inn í málaskrá forsætisráðuneytisins.

 

Fréttablaðið óskaði eftir því fyrir viku síðan að fá afhent afrit af skjalinu með vísun í upplýsingalög, en forsætisráðuneytið hafnaði því. Í synjun ráðuneytisins sagði að skjalið teldist til vinnugagna og að slík gögn væru undanþegin upplýsingarétti almennings samkvæmt upplýsingalögum. Vinnugögn teljist gögn sem stjórnvöld eða lögaðilar hafi „ritað eða útbúið til eigin nota við undirbúning ákvörðunar eða annarra lykta máls.“

Forsetinn hefur sagt að á fyrrgreindum fundi hafi forsætisráðherra óskað eftir því að forsetinn samþykkti tillögu um þingrof.

„Formleg tillaga um þingrof var hvorki borin upp á fundinum né kynnt forseta eins og skilja mátti af ummælum forseta Íslands að fundi loknum,“ sagði hins vegar í frétt sem sett var inn á vef forsætisráðuneytisins nokkru eftir fundinn þann 5. apríl.