Mesta aukning á hagvexti frá 2007

Landsframleiðslan á þriðja ársfjórðungi 2016 jókst að raungildi um 10,2 prósent frá sama ársfjórðungi fyrra árs. Er það mesta aukning á hagvexti sem mælst hefur frá því á fjórða ársfjórðungi 2007 að því er kemur fram í Hagtíðundum Hagstofu Íslands.

Hagvöxtur er reiknaður sem vöxtur landsframleiðslu frá ári til árs og má skýra aukninguna nú með miklum utanríkisviðskiptum en útflutningur jókst um 16,4 prósent samanborið við sama tímabil árið 2015.

Á fyrstu níu mánuðum ársins 2016 jókst landsframleiðslan um 6,2 prósent borið saman við fyrstu níu mánuði ársins 2015. Á sama tíma jukust þjóðarútgjöld, sem eru samtala neyslu og fjárfestingar, um 9,3 prósent Einkaneysla jókst um 6,7 prósent, samneysla um 1,1 prósent og fjárfesting um 27,4 prósent. Útflutningur jókst um 10 prósent og innflutningur nokkru meira, eða um 16,6 prósent.