Tekjuvöxtur hjá mörgum félögum

Fimm félög kynntu uppgjör þriðja ársfjórðungs í gær.

Fjórðungurinn var betri hjá Nýherja en sami ársfjórðungur í fyrra, hagnaður, tekjur og EBITDA hækkuðu. Tekjuvöxtur var 14 prósent sem var meiri en fyrripart árs. Í tilkynningu segir að reksturinn hafi verið á áætlun. Horfur í rekstri séu ágætar.

Jákvæðar fregnir eru einnig af Marel þar sem helstu vísar eru jákvæðir á fjórðungnum. Í tilkynningu segist Árni Oddur Þórðarson forstjóri ánægður með niðurstöðuna. Nálægt 15 prósenta rekstrarhagnaður er fyrir fyrstu níu mánuði ársins. Langtímahorfur Marel séu góðar en til skemmri tíma litið hafi óvissa í heimsbúskapnum aukist.

Hagnaður, tekjur og EBITDA Fjarskipta, móðurfélags Vodafone, drógust saman á fjórðungnum samanborið við sama tímabil árið áður. Fram kemur í tilkynningu frá Fjarskiptum að þriðji fjórðungurinn hafi orðið fyrir áhrifum af flutningum félagsins, samkeppni og verðlækkunum á farsímamarkaði á fyrri hluta ársins. Einskiptiskostnaður vegna húsnæðismála nam 50 milljónum króna. EBITDA horfur eru lækkaðar vegna skoðunar félagsins á mögulegum kaupum á ljósvaka- og fjarskiptahluta 365 og er áætlað að þær verði í kringum 3,1 milljarður fyrir árið.

Hagnaður Össurar dróst saman á milli ára. Hagnaður nam 13 milljónum dollara, jafnvirði 1.480 milljóna króna, samanborið við 14 milljónir dollara, jafnvirði 1.590 milljóna króna, árið áður. Tekjur námu 129 milljónum dollara, 14,7 milljörðum króna, á tímabilinu samanborið við 117 milljón dollara, 13,3 milljarða króna, á sama tímabili árið 2015. Í tilkynningu segir Jón Sigurðsson framkvæmdastjóri að tekjuvöxtur hafi verið góður á fjórðungnum. Vegna kaupa á Medi Prosthetics er spáð enn meiri tekjuvexti á árinu, eða 8-10 prósentum, í stað 7-9 prósenta.

VÍS, eins og önnur tryggingafélög, hefur átt erfitt uppdráttar á árinu. Hagnaður á fjórðungnum sem og aðrir vísar eru neikvæðir miðað við sama tímabil árið áður. Samkvæmt afkomu fyrstu níu mánaða ársins nemur hagnaður af rekstri 592 milljónum króna, sem er 30 prósent af hagnaðinum á sama tímabili í fyrra.

Í tilkynningu segir Jakob Sigurðsson forstjóri að jákvætt sé að sjá hve mikið iðgjöld hafi aukist það sem af er ári, eftir nokkurra ára stöðnun, eða um 11,2 prósent frá sama tíma í fyrra. Gert er ráð fyrir að áfram verði ágætur vöxtur í innlendum iðgjöldum á árinu en ólíklegt er að samsett hlutfall verði í árslok lægra en það var fyrir árið 2015.

Uppgjör hinna tryggingafélaganna auk Símans og Landsbankans verða kynnt í dag. 



Fréttin birtist fyrst í Fréttablaðinu