Innlent

Viðreisn er í lykilstöðu

Birgir Olgeirsson skrifar
Benedikt Jóhannesson ásamt Vigdísi Jóndóttur við komuna á kjörstað í morgun.
Benedikt Jóhannesson ásamt Vigdísi Jóndóttur við komuna á kjörstað í morgun. Vísir/Þórhildur

„Ég á ekki von á einhverjum grundvallarbreytingum. Stóru línurnar eru komnar. En það er ekki búið að telja,“ segir Baldur Þórhallsson stjórnmálafræðingur aðspurður hvort hann eigi von á einhverjum stórkostlegum breytingum í fylgi flokka eftir eftir að fyrstu tölur voru lesnar upp í kvöld.

Sjálfstæðisflokkurinn hefur styrkt stöðu sína verulega, sem og Vinstri græn, en Viðreisn hefur náð miklum árangri sem og Píratar. Aðspurður hvort þessar tölur séu ekki nánast í samræmi við skoðanakannanir segir Baldur svo ekki vera því Píratar hafi fengið mun minna í kosningunum en kannanir gáfu til kynna.

Ef niðurstaða kosninganna verður sú sem fyrstu tölur gefa til kynna þá á Baldur ekki von á því að Sjálfstæðisflokkurinn fái stjórnarmyndunarumboðið.

„Það mun ráðast af því hvað flokkarnir koma sér saman um að mæla með við forsetann sem veitir stjórnarmyndunarumboðið. Samkvæmt nýjustu tölunum eru stjórnarflokkarnir með 27 þingmenn og stjórnarandstaðan með 29 þingmenn og Viðreisn með sjö þingmenn. Viðreisn er í lykilstöðu og stóra spurningin er hvort Viðreisn mun ganga til viðræðna við stjórnarandstöðuflokkana fjóra,“ segir Baldur Þórhallsson.

Hann segir því stóru spurningu kvöldsins vera hvað Benedikt Jóhannesson og Viðreisn munu velja.

„Það mun ráðast af því hver fær stjórnarmyndunarumboðið hvern Benedikt Jóhannesson og Viðreisn leggur til að fái það. Hann hefur útilokað að ganga til liðs við stjórnarflokkana tvo og vera þriðja hjólið undir vagninum. Þannig að það kæmi mér ekki á óvart ef fyrsta tilraun til stjórnarmyndunarviðræðna væri á milli þessara fimm flokka,“ segir Baldur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.