Stjörnuspá Siggu Kling kemur inn á föstudaginn: Svarar spurningum í beinni

„Ég vil endilega að fólk sendi inn einlægar spurningar frá hjartanu í stað þess að senda bara fæðingardaginn, þó hann verði að fylgja með,“ segir Sigríður Klingenberg sem verður í beinni útsendingu á Facebook-live og á Vísi á föstudaginn klukkan 14:00.

Stjörnuspár Sigríðar Klingenberg spámiðils hafa notið gríðarlega vinsælda undanfarin ár. Mánaðarlega spáir hún fyrir lesendum Vísis og Fréttablaðsins, í formi texta og myndbands, en spár hennar fyrir októbermánuð detta í hús snemma á föstudagsmorgun.

„Fólk er búið að vera stoppa mig í Bónus og blaðamenn hafa verið að hringja í mig, allir eru að pæla hvar stjörnuspáin mín er,“ segir Sigga en sú breyting var gerð á fyrirkomulagi Stjörnuspárinnar að núna birtist hún fyrsta föstudag í hverju mánuði.

Sigga ætlar að gera sitt besta til að svara öllum spurningum og reyna þannig skyggnast inn í líf okkar lesenda. Hún getur einnig sagt ýmislegt um fortíð lesenda og framtíð þeirra ef þeir biðja hana um að rýna í fæðingardag sinn. Í byrjun september var fyrsta beina útsendingin og voru viðtökurnar frábærar. Við skorum því á okkar lesendur að taka þátt og senda inn spurninga í gegnum Facebook.