Körfuboltaskemmtun í Keflavík

Það verður blásið í herlúðra í Keflavík á föstudag er haldinn verður körfuboltaskemmtun til styrktar Pétri Péturssyni Osteopata.

Pétur er að glíma við erfið veikindi og vinir hans hafa því ákveðið að styðja við bakið á honum og fjölskyldu hans með flottu kvöldi í Keflavík. Skemmtunin hefst klukkan 18.30 í íþróttahúsinu í Keflavík.

Það verður rukkað 2.000 krónur inn eða frjáls framlög. Einnig er hægt að leggja framtakinu lið með því að leggja inn á söfnunarreikning 0142-15-382891, kennitala 041074-3969.

Allir sem koma að viðburðinum gefa vinnu sína og allur ágóði rennur því óskiptur til Péturs og fjölskyldu.

Á þessu kvöldi mun A-landslið karla og kvenna meðal annars spila stuttan leik gegn pressuliðinu. Svo munu gamlar kempur taka þátt í þriggja stiga keppni.

Páll Óskar leggur málstaðnum einnig lið en hann mætir og tekur lagið.

Hér að ofan má svo sjá innslag sem Kjartan Atli Kjartansson gerði um kvöldið.