Ekki fara í skiptinám

Þú ert rifinn frá fjölskyldu þinni og þér er hent yfir hálfan hnöttinn þar sem þú þekkir engan né neitt. Þú getur ekki tjáð þig og þarft að treysta á að brosið þitt sé nógu breitt í þeim tilgangi að eignast vini. Þú þarft að gleyma öllu sem þú hefur lært og gersamlega að endurskapa þig til þess að blandast inn í menninguna.

Síðan þegar þú ert loksins farinn að ná tökum á hlutunum er þér aftur kastað í burt. Þú eignast ekki aðeins vini frá landinu sem þú dvelur í heldur eignastu vini úr öllum heimshornum. En skyndilega eru allir vinir þínir farnir til baka í sitthvor heimshornin.

Með þeim áttu svo sameiginlegt að þegar þú loksins kemur heim ertu ekki lengur heima. Svo virðist sem hjarta þitt hafi sundrast í þúsund mola sem dreifðu sér yfir allan hnöttinn. Þú ert dæmdur til að reika um jörðina og tína saman brotin, eitt í einu.

Pistillinn birtist fyrst í Fréttablaðinu