Varðskipið Týr komið að áströlsku skútunni

Varðskipið Týr kom að áströlsku skútunni sem óskað hafði aðstoðar vegna leka klukkan rúmlega tíu í gærkvöldi.

Í tilkynningu frá Landhelgisgæslunni segir að varðskipsmenn hafi flutt tæpa 220 lítra af eldsneyti yfir til skútunnar, auk þess að kanna skemmdir á henni.

„Að lokinni eldsneytisgjöf og mati á skemmdum var ákveðið að skútan héldi til hafnar á Íslandi til viðgerðar en ekki var talin þörf á að varðskipið fylgdi skútunni.

Skútan er í samfloti með annarri skútu sem mun fylgja henni til hafnar og eru þær væntanlegar seinnipartinn á morgun, fimmtudag,“ segir í tilkynningunni.