Frakkar skoruðu fjögur mörk í fyrri hálfleiknum og unnu leikinn á endanum 5-2. Frakkar mæta því heimsmeisturum Þjóðverja í undanúrslitum EM 2016.
Fyrir þrjátíu árum fékk önnur Norðurlandaþjóð skell eftir frábært gengi á sínu fyrsta heimsmeistaramóti
Danir voru spútniklið HM í Mexíkó eftir að hafa unnið alla þrjá leiki sínum í riðlinum þar af 6-1 sigur á Úrúgvæ og 2-0 sigur á Vestur-Þjóðverjum.
Það var ekki bara frammistaða leikmannanna inn á vellinum sem vakti athygli því einnig var frammistaða stuðningsfólksins til mikillar fyrirmyndar. Hver man ekki eftir „dönsku rooligans" eins og þeir kölluðu sig.
Preben Elkjær Larsen og Michael Laudrup voru allt í öllu í sóknarleik danska liðsins en Preben Elkjær var með þrennu í sigrinum á Úrúgvæ og sigurmarkið á móti Skotum.
Danir mættu í sextán liða úrslitin með þrjá sigra í þremur leikjum og markatöluna 9-1. Það voru því miklar væntingar fyrir leikinn á móti Spáni í sextán liða úrslitunum.
Danir komust reyndar í 1-0 í leiknum á móti Spáni en Spánverjar svöruðu með fimm mörkum og tryggðu sér sæti í átta liða úrslitunum. Gammurinn Emilio Butragueno skoraði fjögur af þessum fimm mörkum.
Gleðin var þó ekki lengi í herbúðum Spánverja sem töpuðu í vítakeppni í átta liða úrslitunum á móti Belgum.
Hér fyrir neðan má sjá klippu úr DV daginn eftir þennan leik fyrir 30 árum. „Tekið á móti (Dönum .. Íslendingum) sem þjóðhöfðingjum“ gæti einnig átt við hér á Íslandi því það er pottþétt að íslenska þjóðin mun taka vel á móti Strákunum sínum þegar þeir koma heim frá Frakklandi.
