Er Hiddleswift bara allt í plati?

Mikið hefur verið skrifað um ástarsamband Taylor Swift og breska leikarans Tom Hiddleston í slúðurpressunni undanfarið. Sérstaklega í ljósi þess að söngkonan hætti nýverið með tónlistarmanninum Calvin Harris. Aðeins nokkrum dögum síðar birtust myndir af henni með leikaranum í afar rómantískum stellingum, hér og þar... og hreinlega alls staðar.

Taylor bauð breska leikaranum meira að segja að hitta mömmu og pabba sem var eitthvað sem hún gerði víst aldrei á meðan hún var með popparanum Harris.

Leikur á fjölmiðla?

Vangaveltur um sambandið hafa verið miklar og nú eru samsæriskenningarnar byrjaðar að flæða inn. Ein kenningin er sú að samband Taylor Swift og Tom Hiddleston, eða „Hiddleswift“ eins og það hefur verið kallað, sé ekki ekta. Heldur sé þarna í raun um listrænan gjörning Swift að ræða þar sem hún sé við tökur á nýju tónlistarmyndbandi. Að sambandið sé í raun sviðsett til þess að leika á Paparazzana. Að í raun séu Swift með ljósmyndara og tökumenn á launum og sé að gera svipaðan gjörning og Joaquin Phoenix gerði þegar hann þóttist hætta í kvikmyndaleik til þess að einbeita sér að hiphoppinu.

Þannig yrði nýja myndbandið bæði leið til þess að leika á fjölmiðla og gagnrýna þá athygli sem einkalíf stjarnanna fær.

Þetta gæti komið heim og saman við þá staðreynd að söngkonan ætlar í sumar að gefa út nýja smáskífu af nýrri plötu sem er væntanleg. Einnig þykja þau hjú hafa verið ansi dugleg við ferðalögin og óvenju lítið fyrir það að reyna fá næði þegar þau eru tvö saman á meðal almennings.

Í gær sást til dæmis til þeirra í hópi með leikara- og fyrirsætu vinum sínum á strönd við Rhode Island en þar voru m.a. Cara Delevinge, Karlie Kloss, Ruby Rose, Blake Lively, Ryan Reynolds og Gigi Hadid.

E-Online fjallar ítarlega um málið.