Blóðugt myndband við nýjasta lag Sigur Rósar krefst fullrar einbeitingar

Sigur Rós hefur sent frá sér tónlistarmyndband við lagið Óveður sem er fyrsta útgáfa sveitarinnar frá árinu 2013. Leikstjóri myndbandsins er Jonas Åkerlund en það var tekið upp í Grindavík. Í myndbandinu leikur danshöfundurinn Erna Ómarsdóttir ásamt því að meðlimum hljómsveitarinnar bregður fyrir. Klippingin í myndbandinu er afar hröð á köflum og ansi margt í gangi þannig að ef áhorfandinn blikkar auga gæti hann misst af nokkrum áhugaverðum römmum.

Þjóðvegi eitt, 24 klukkustunda hægvarpi Sigur Rósar um Ísland í samstarfi við RÚV og Rás 2 lauk á tíunda tímanum í kvöld en nú þegar hafa rúmlega hálf milljón manns fylgst með beinni útsendingu þess á netinu. Kom lagið Óveður um leið og hægvarpinu lauk.