Á annað þúsund hafa kosið um nýjan formann Samfylkingarinnar

Allsherjaratkvæðagreiðsla um nýjan formann Samfylkingarinnar hófst á laugardaginn og lýkur föstudaginn 3. júní þegar landsfundur flokksins hefst.

Fjórir eru í framboði til formanns en það eru þau Guðmundur Ari Sigurjónsson, bæjarfulltrúi á Seltjarnarnesi, Helgi Hjörvar þingmaður Reykvíkinga, Magnús Orri Schram varaþingmaður Suðvesturkjördæmis og Oddný G Harðardóttir þingmaður Suðurkjördæmis. Árni Páll Árnason sitjandi formaður ákvað fyrr í mánuðinum að gefa ekki kost á sér til endurkjörs.

Kristján Guy Burgess, framkvæmdastjóri Samfylkingarinnar, segir þátttökuna hafa verið góða um helgina.

„Þátttakan hefur verið nokkuð góð. Ég er ekki með allra nýjustu tölur en þetta var komið á annað þúsund í morgun.“

Um 17 þúsund manns eru á kjörskrá hjá Samfylkingunni.

„Við erum nokkuð spennt fyrir þessum landsfundi. Það verður kosið í öll embætti innan flokksins. Formaðurinn verður kosinn með allsherjaratkvæðagreiðslu en á landsfundinum sjálfum verður kosið í önnur embætti.“

Kristján segir málefnastarf landsfundarins vera með öðru sniði en áður.

„Síðan koma landsfundarfulltrúar allstaðar af landinu og semja í sameiningu áherslur flokksins fram að kosningum. Við erum að nota nýtt fyrirkomulag, það verður þjóðfundarform þar sem að allir landsfundarfulltrúar ræða þau mál sem þar eru og úr því koma svo ályktanir með nýju sniði.“

Samfylkingin hefur séð sinn fífil fegurri en hún mældist með 6,1 prósent fylgi í síðustu skoðanakönnun Fréttablaðsins. Kristján segir þá stöðu óásættanlega.

„Þessvegna ríður á að Samfylkingarfólk um allt land komi saman og kjósi sér nýja forystu og marki áherslurnar í sameiningu fram á við. Það er leiðin sem við förum í erfiðri stöðu er að kalla fólkið okkar saman allstaðar af landinu til að það finni kraftinn hvert í öðru og marki leiðina fram.“

Þá hefur ein mannsekja boðið sig fram til varaformanns flokksins, Sema Erla Serdar, formaður framkvæmdastjórnar Samfylkingarinnar. Enn er opið fyrir framboðsfrest til embættis varaformanns en kosið er um það embætti á landsfundinum.

Uppfært kl.13:37.

Margrét Gauja Magnúsdóttir, bæjarfulltrúi í Hafnarfirði og námsráðgjafi tilkynnti rétt í þessu framboð til varaformann Samfylkingarinnar.