Búið að skrifa undir kaupsamning vegna Ásmundarsalar

Alþýðusamband Íslands (ASÍ) og nýir eigendur Ásmundarsalar við Freyjugötu, hjónin Aðalheiður Magnúsdóttir og Sigurbjörn Þorkelsson, skrifuðu í dag undir kaupsamning vegna sölu Ásmundarsalar sem hýsti Listsafn ASÍ.

Salan hefur verið umdeild en svo virðist sem að mistök hafi orðið til þess að hæsta tilboðinu í húsið hafi ekki verið tekið. Mistökin hafi falist í því að ekki bárust upplýsingar um þau tilboð sem gerð voru með réttum hætti. Hjónin Aðalheiður og Sigurbjörn greiddu 168 milljónir króna fyrir Ásmundarsal en fasteignamat hússins er 76,7 milljónir króna.

Framkvæmdastjóri fasteignasölunnar Valhallar, Ingólfur Geir Gissurarson, sem annaðist söluna á Ásmundarsal harmar mistökin og sagði í samtali við Vísi að fasteignasalan muni sannarlega bera ábyrgð hafi hún sannarlega valdið tjóni.

Í samtali við Vísi nú síðdegis sagði Ingólfur Geir að málinu væri lokið í sátt og samlyndi við ASÍ eftir að farið hafi verið yfir hvað fór úrskeiðis. Eftir það hafi allir aðilar hafi skilið sáttir.

Kaupsamningurinn látinn standa þrátt fyrir athugun ASÍ

Þrátt fyrir athugun ASÍ á málinu var kaupsamningurinn við Aðalheiði og Sigurbjörn látinn standa og var hann undirritaður í dag. Nýju eigendurnir lögðu áherslu á að viðhalda list- og menningarhlutverki hússins þegar tilkynnt var um kaupin og í tilkynningu um undirritun kaupsamningins kemur fram að ASÍ fagnar „áformum hjónanna að nýta húsið áfram í þágu listar og hönnunar og óskar nýjum eigendum velfarnaðar á þeirri vegferð.“

Sjá einnig: Fasteignasalan sem annaðist sölu á Ásmundarsal: Öxlum ábyrgð ef við höfum sannarlega valdið tjóni

Samband íslenskra myndlistarmanna (SÍM) hefur harðlega gagnrýnt söluna á Ásmundarsal en sambandið hafði hug á því að kanna hvort að það gæti keypt salinn. SÍM harmar það að safnið sé nú komið í einkaeigu þrátt fyrir fyrirheit um að húsið verði áfram nýttt undir lista- og menningarstarfsemi.

„Þó að kaupandinn segist ætla að vera með myndlist og hönnun þá er þetta komið í einkaeigu og þá verða það alltaf útvaldir sem fá að sýna,“ sagði Jóna Hlíf Halldórsdóttir, formaður SÍM í samtali við Fréttablaðið.