Júníspá Siggu Kling – Meyja: Vínið hefur drekkt fleirum en hafið

Elsku magnaða Meyjan mín. Það er hægt að segja að þú sért að fara inn í tímabil þar sem ljósin kvikna og slokkna til skiptis.

Þú þarft að setja þig betur í samband, fylgjast með öllu og fá hjálp ef þig vantar hjálp. Er ekki allt í lagi að biðja svona einu sinni?

Vinir þínir eru misjafnir. Þeir eru kannski svolítið eins og brjóst. Koma í alls konar útfærslum. Eru kannski stórir, litlir, alvöru eða gervi. Og það er líka bara allt í lagi! Það hafa allir sínir galla og líka sína kosti. Skoðaðu vel þá kosti sem vinir þínir hafa þótt þeir séu ekki alltaf að hegða sér nákvæmlega eins og þú vilt.

Þú þarft að velja góðmennskuna í þér og dreifa henni eins og fræjum. Sál þín vex með hverri gjöf sem þú gefur frá þér. Og sú stækkun á að vera næg verðlaun fyrir þig og þú skalt ekki búast við neinu öðru til baka.

Hlustaðu á fjölskylduna þína, hún er að færa þér rétt skilaboð og hún elskar þig svo miklu meira en þú gerir þér grein fyrir. Skoðaðu það vel.

Þú átt eftir að taka lífinu fagnandi og sérstaklega þegar að stressið er að dansa í kringum þig. Það verður þér sannarlega til góða að gera akkúrat það. Hafðu það hugfast elsku, Meyjan mín.

Fjölskyldan þarf að sameinast og þú þarft að ná jafnvægi á milli vinnu, ástar og félagslífs. Það er svo mikilvægt að hafa jafnvægi.

Það eru ekki allir sem hafa svona sterka og góða kímnigáfu eins og þú, en það er kímnigáfan þín sem kemur þér lengst. Ég hreinlega veit ekki hvernig hlutirnir myndu ganga ef þú værir ekki svona húmorísk!

Þið sem standið í viðskiptum eigið eftir að afla vel en verið á varðbergi því það gæti líka verið að það yrði stolið frá ykkur. Ekki gera of mikið úr því, hugsið bara að þið séuð að gefa tíund. Það er mikið um gleði og veislur framundan. Þú munt kynnast mörgum og ástin mun finna þig ef þú trúir á hana og ert tilbúin. Þú þarft nefnilega að vera algjörlega tilbúin fyrir hana til þess að það gerist. En þegar þú elskar þá elskar þú svo sannarlega! Ef þú vilt og ert á lausu þá er þinn tími kominn í ástinni.

Ég elska þig þegar þú tekur þessa afslöppuðu afstöðu til lífsins. Því að þegar þær tilfinningar fljóta til þín þá færð þú allt upp í hendurnar og þarft ekki að stjórna öllu.

Vínið hefur drekkt fleirum en hafið sjálft og ef þú kannt ekki að synda þá skaltu ekki stinga þér. Þessi setning getur átt við um fólk í kring um þig eða ýmislegt sem þú ert að skoða hjá þér.

Knús til þín,

Sigga Kling

Frægar meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður.