Icewear samdi við erlent eftirlitsfyrirtæki í kjölfar mansalsmálsins

Icewear hefur samið við alþjóðlega eftirlitsfyrirtækið SGS um reglubundnar skoðanir og eftirlit með starfsemi þeirra fyrirtækja sem starfa fyrir Icewear erlendis.

Þetta kemur fram í tilkynningu frá Icewear en um er að ræða 14 fyrirtæki, bæði fataverksmiðjur og saumastofur í Asíu og Evrópu. Markmið samningsins er að tryggja að fyrirtæki sem starfa  fyrir Icewear fari eftir lögum um launagreiðslur, aðbúnað, öryggi og almenna hollustuhætti á vinnustöðunum.

Í febrúar síðastliðnum var undirverktaki Icewear hér á landi handtekinn grunaður um mansal. Maðurinn, sem starfrækti saumastofu í Vík í Mýrdal, sætir enn gæsluvarðhaldi en hann er frá Srí Lanka. Í tilkynningu Icewear segir að stjórnendur fyrirtækisins hafi leitað til SGS eftir að mansalsmálið í Vík kom upp.