Lilja segir að Sigmundur Davíð þurfi andrými

Lilja Alfreðsdóttir utanríkisráðherra segir að Sigmundur Davíð Gunnlaugsson þurfi andrými og tíma til að funda með flokksmönnum áður en hægt sé að kveða úr um hvort hann geti verið formaður Framsóknarflokksins í kosningabaráttunni í haust.

Sigmundur Davíð Gunnlaugsson sagði af sér embætti forsætisráðherra eftir að Wintris málið kom upp og eftir að sýnd var upptaka af honum í Kastljósi segja ósatt um aðild sína að félaginu Wintris Inc. í viðtali við sænska blaðamanninn Sven Bergman og Jóhannes Kr. Kristjánsson.

Sigmundur er ennþá formaður Framsóknarflokksins. Eftir að hann hætti sem forsætisráðherra og tók sér leyfi frá þingstörfum um óákveðinn tíma hefur verið rætt um hvort hann geti leitt framsóknarmenn í gegnum kosningabaráttu í haust eða hvort hann sé of skaddaður til að leiða flokkinn í gegnum slíka baráttu. Stefnt er að því að kosið verði til Alþingis í síðari hluta október.

Lilja Alfreðsdóttir utanríkisráðherra vill ekki svara því beint út hvort hún teljij að Sigmundur eigi að leiða Framsóknarflokkinn í kosningabaráttunni í haust.

„Sigmundur Davíð steig til hliðar og hann er að fá ákveðið andrými. Hann hefur boðað það að hann ætli að funda með flokksfélögum um land allt. Ég hlakka til þess að hann geri það. Þetta er mjög öflugur forystumaður í íslenskum stjórnmálum og hefur verið það. Hann kemur inn árið 2009, þá held ég að fylgi flokksins hafi verið í kringum níu prósent og rífur þetta allt upp,“ sagði Lilja.

Lilja Alfreðsdóttir var gestur Heimis Más Péturssonar á Sprengisandi í morgun. Hlusta má á viðtalið í klippunum hér að ofan og neðan.