Starfsmenn álversins í Straumsvík samþykktu miðlunartillögu

Sátt hefur náðst í kjaradeilu starfsmanna við ISAL, álver Rio Tinto Alcan í Straumsvík. Miðlunartillaga ríkissáttasemjara var samþykkt en tillagan var lögð fram þann 19. mars síðastliðinn.

85 prósent starfsmanna greiddu atkvæði og var tillagan samþykkt með 61 prósent atkvæða.

Vinnustöðvun í álverinu í Straumsvík var frestað tímabundið á meðan atkvæðagreiðsla fór fram en henni lauk klukkan fjögur í dag. Niðurstaðan var kynnt í húsakynnum Ríkissáttasemjara í Borgartúni. 

Guðmundur Ragnarsson, formaður VM – félags vélstjóra og málmtæknimanna segir erfitt að segja að menn séu ánægðir með niðurstöðuna en bendir á að kjaradeilan hafi staðið í fimmtán mánuði. Því hafi þetta verið „niðurstaða sem báðir aðilar kinkuðu kolli með.“ Guðmundur segir að um sömu launahækkanir og á almennum vinnumarkaði sé að ræða. Auk þess hafi samningsaðilar reynt að mætast á miðri leið hvað varðar aðrar kröfur starfsmanna. Rætt var við Guðmund í kvöldfréttum Stöðvar 2.