Háskóli Íslands hoppar upp um tæplega fimmtíu sæti

Háskóli Íslands hoppaði um tæplega fimmtíu sæti á lista Times Higher Education yfir bestu háskóla heimsins eftir að í ljós kom að villa var gerð þegar listinn var tekinn saman. Skólinn var áður í 270. sæti listans en er nú í 222. sæti.

Stökkið þýðir að Háskóli Íslands er nú í 13. sæti á listanum yfir skóla á Norðurlöndunum. Við mat á stöðu háskóla á listanum horfir Times Higher Education til ýmissa atriða en þar má nefna áhrif á alþjóðlegum vettvangi, rannsóknarstarfs og kennslu.

„Niðurstaðan er mikil viðurkenning fyrir alla þá sem starfa hér og nema. Þá má ekki gleyma einkar öflugum samstarfsaðilum innanlands og utan sem gera hann enn betri, s.s. Landspítalanum, Íslenskri erfðagreiningu, Hjartavernd, Matís og alþjóðlegum samstarfsháskólum,“ segir Jón Atli Benediktsson, rektor Háskóla Íslands, í samtali við vef skólans.