Blása til fundar þegar Sigmundur kemur úr fríi

Landsstjórn Framsóknarflokksins hefur tekið ákvörðun um að halda vorfund miðstjórnar flokksins þegar Sigmundur Davíð Gunnlaugsson, formaður flokksins og fyrrverandi forsætisráðherra, hefur snúið aftur úr leyfi.

Sjá einnig: Skiptar skoðanir meðal framsóknarráðherra um flokksþing

Þetta var niðurstaða fundar landsstjórnarinnar sem fram fór í gærkvöldi. 14 manns eiga sæti í landsstjórn flokksins; þar með talinn formaður og varaformaður flokksins, formaður þingflokksins, ritari og formenn kjördæmaráða. 

Sigmundur Davíð fór í frí þann 11. apríl síðastliðinn og hugðist nýta leyfið til að funda með Framsóknarmönnum um land allt. Búist er við því að hann komi aftur úr leyfi um mánaðamótin maí/júní. Hjálmar Bogi Hafliðason, fyrsti varaþingmaður Framsóknarflokksins í norðausturkjördæmi, tók sæti á Alþingi í hans stað.

Sjá einnig: Sigmundur Davíð farinn í frí

Fram kemur í færslu Eyglóar Harðardóttur félagsmálaráðherra að framkvæmdastjóra Framsóknarflokksins hafi verið falið að senda út fundarboð á flokksmenn með nánari upplýsingum á næstunni um fundinn. Eygló vildi ekki ræða við fréttastofu þegar eftir því var leitað.