Íslenskur skiptinemi í Ekvador upplifði sinn fyrsta jarðskjálfta: „Mundi það sem er kennt á Íslandi“

Hin 17 ára gamla Elísabet Jónsdóttir er skiptinemi í Ekvador og upplifði jarðskjálftann sem þar reið yfir í nótt. Skjálftinn mældist 7,8 að stærð og er sá öflugasti í landinu frá árinu 1979. Staðfest hefur verið að 235 hafi látist og minnst fimm hundruð hafi slasast.

Elísabet er skiptinemi í fjölmennasta borg Ekvador, Guayaquil, á vegum AFS-samtakanna en alls eru fjórir Íslendingar á vegum samtakanna í Ekvador og eru þeir allir heilir á húfi. Borgin er staðsett um þrjú hundruð kílómetra frá miðju skjálftans en Elísabet segir að hann hafi þó fundist vel.

„Ég sat á rúminu mínu og allt byrjaði að hristast,“ segir Elísabet í samtali við Vísi. „Þetta byrjaði frekar rólega en svo fór allt af stað og hlutir hérna inni hrundu í gólfið.“

Aldrei upplifað jarðskjálfta áður

Elísabet er Akureyringur sem verður seint talinn þungamiðja jarðskjálfta á Íslandi þrátt fyrir að þar finnist stöku skjálfti. Hún hefur ekki upplifað jarðskjálfta áður en segir að í miðjum skjálftanum hafi kennsla og fræðsla um jarðskjálfta frá Íslandi skotið upp í kolli sínum.

„Ég hugsaði aðallega um það að fá systur mína til mína,“ segir Elísabet aðspurð um hvað hún hafi hugsað um á meðan skjálftinn reið yfir. „Hún var í öðrum enda herbergisins og ég hugsaði bara um að koma okkur þangað sem ekkert myndi falla á okkur. Maður mundi greinilega aðeins það sem þeir kenna manni á Íslandi.“

Líkt og fyrr sagði er Guayaquil töluvert fjarri miðju skjálftans og segir Elísabet að hún hafi heyrt af því að einhver hús hafi skemmst og þá aðallega verslunarmiðstöðir en almennt séð væri borgin í nokkuð heilu lagi.

Skjálftinn olli mestu tjóni í norðvesturhluta landsins þar sem greint hefur verið frá því að heilu þorpin hafi nánast jafnast við jörðu. Jarðskjálftar eru nokkuð tíðir í Ekvador en Elísabet segir að ekki sé gefið að allir fái þá fræðslu sem þarf til þess að bregðast rétt við.

„Ég hef farið á jarðskjálftaæfingar í skólanum þar sem viðbrögð við jarðskjálfum eru kennd. Ég geri ráð fyrir að þar sem hægt er fá fræðslu hafi fólk fengið hana að einhverju leyti í það minnsta. Það er mikil fátækt hérna í Ekvador og töluvert mikil misskipting,“ segir Elísabet.

Kort af Ekvador. Upptök skjálftans voru skammt frá Esmeraldas í norðvesturhluta landsins.

Ekkert fararsnið á henni

Elísabet er búinn að vera í Ekvador í um átta mánuði og á þrjá mánuði eftir af dvöl sinni. Hún segist ekki finna fyrir neinu óöryggi vegna skjálftans og það hvarflar ekki að henni að koma fyrr heim. Hún segir að hún búi í sterkbyggðu húsi og að fjölskylda sín í Ekvador sem hún dvelur hjá og AFS-samtökunum séu mjög ábyrg, því sé hún alveg róleg.

„Þau myndu kippa okkur úr landinu ef eitthvað væri til að hafa áhyggjur af. Ég er alveg róleg og finn ekki neina þörf til þess að fara frá Ekvador.“