Skiptinemar AFS í Ekvador allir óhultir

Fjórir íslenskir skiptinemar eru staddir í Ekvador, þar sem öflugur jarðskjálfti reið yfir í nótt, á vegum AFS-samtakanna. Samtökin hafa fengið það staðfest að öll fjögur eru óhult.

„Þegar svona gerist fer viðbragðsáætlun í gang hjá viðkomandi landi og við fengum það staðfest mjög fljótlega að það væru vísbendingar um að allir væru óhultir,“ segir Guðmundur Gunnarsson, framkvæmdastjóri AFS á Íslandi. „Svo núna í morgun var búið að hafa beint samband við alla, eða fjölskyldur allra.“

Að sögn Guðmundar liggur það nú fyrir að allir skiptinemar AFS í Ekvador, alls 71, eru óhultir.

Skjálftinn í nótt mældist 7,8 að stærð og er sá öflugasti í landinu frá árinu 1979. Að minnsta kosti 77 létu lífið og rúmlega 500 slösuðust.

Skemmdir eftir jarðskjálftann eru miklar, tugir bygginga hafa hrunið og að minnsta kosti ein brú.