Kæra ákvörðun lögreglustjóra á Vestfjörðum

Fimm einstaklingar hafa kært ákvörðun lögreglustjóra á Vestfjörðum um að hætta rannsókn á meintri fjárkúgun í fiskvinnslu Jakobs Valgeirs í Bolungarvík. Allir þeir sem kæra ákvörðunina störfuðu í fiskvinnslunni.

Rannsókn lögreglu á meintum fjárkúgunum í Bolungarvík hafði staðið yfir í rúmlega tvö ár þegar hún var felld niður. Upphaf málsins má rekja til þess þegar fréttamiðlinum Bæjarins besta barst bréf þar sem pólskur verkstjóri hjá útgerðarfyrirtækinu Jakob Valgeir ehf. var sagður hafa tekið eitt þúsund evrur, um 150 þúsund íslenskra króna af öðrum Pólverjum sem hann hafði milligöngu um að útvega vinnu.

Í bréfinu eru birt nöfn um tuttugu Pólverja sem sagðir eru hafa greitt verkstjóranum þessa fjárhæð. Lögreglan fékk bréfið til skoðunar.

Lárus Benediktsson, formaður Verkalýðs- og sjómannafélags Bolungarvíkur, afhenti lögreglu gögn í málinu. Í kjölfarið var leitað eftir aðstoð mansalsteymis að sunnan. Lárus fundaði einnig með bæjarstjóranum og félagsmálastjóra og gerði þeim grein fyrir því að málið skaðaði bæinn.

„Þetta gæti ekki verið gott til frásagnar fyrir bæinn ef rétt reyndist.“ sagði Lárus í viðtali við Fréttablaðið um málið. Nú hefur lögregla fellt niður rannsókn málsins. Fimm meintir brotaþolar í málinu, fyrrverandi starfsmenn fiskvinnslunnar, ákváðu að una ekki ákvörðun lögreglustjórans á Vestfjörðum og kærðu hana til ríkissaksóknara. „Rannsókn í málinu var hætt, henni var bara lokið og hætt,“ segir Karl Ingi Vilbergsson, lögreglustjóri á Vestfjörðum, og staðfestir að ákvörðun hans hafi verið kærð til ríkissaksóknara. Hann vill ekki tjá sig um ástæður þess að rannsókn málsins var hætt eða tjá sig um málið.

Unnt er að kæra til ríkissaksóknara ákvörðun lögreglustjóra og héraðssaksóknara um að vísa frá kæru, hætta rannsókn, fella niður mál og falla frá saksókn. Ríkissaksóknari þarf að taka afstöðu til kærunnar innan þriggja mánaða frá því að kæran barst honum, skrifa lögreglustjóra bréf og óska eftir afriti af málsgögnum og setja fram rökstuðning.

Mansalsteymi lögreglunnar veitti ráðgjöf vegna rannsóknarinnar. Þekkt er að verkafólk greiði verndartolla til að tryggja að það haldi vinnu sinni og eru slíkar greiðslur merki um að ef til vill þurfi að rannsaka hvort mansal sé á ferðinni. „Það er verið að hagnýta sér viðkomandi sem þekkir ekki umhverfið og réttindi sín,“segir Snorri Birgisson hjá lögreglunni á höfuðborgarsvæðinu og sérfræðingur í mansali hjá lögreglunni. „Það er meiri skilningur á þessum málum núna í kjölfar aukinnar fræðslu um einkenni mansals.“