Munu leggjast gegn arðgreiðslu á aðalfundi VÍS

Stærstu hluthafar VÍS ætla ekki að styðja óbreytta tillögu um útgreiðslu 5 milljarða króna arðs á aðalfundi félagsins hinn 17. mars næstkomandi.

Greint hefur verið frá því að stjórnir tryggingafélaganna þriggja, VÍS, TM og Sjóvár, vilja greiða hluthöfum samtals 9,6 milljarða í arð vegna síðasta reikningsárs.

Arðgreiðslurnar eru í samræmi við lög um vátryggingarstarfsemi og án ótvíræðrar lagaheimildar getur Fjármálaeftirlitið ekki gefið tryggingafélögunum bindandi fyrirmæli um ráðstöfun arðs. Slík lagaheimild er ekki fyrir hendi.

Þrátt fyrir lögmætið eru arðgreiðslurnar afar umdeildar. Sú umdeildasta er sennilega hjá VÍS en félagið sendi í lok nóvember bréf á viðskiptavini sína þar sem tilkynnt var að iðgjöld yrðu hækkuð vegna slæmrar afkomu. Stjórn VÍS ákvað síðan í lok febrúar að greiða 5 milljarða króna í arð til hluthafa vegna rekstrar síðasta árs.

Unnur Gunnarsdóttir forstjóri FME hafði þetta að segja um arðgreiðslu VÍS í fréttum okkar í gær: „Þetta er svolítið sérstök atburðarás og ekki heppileg. Menn hafa kannski ekki gætt að orðspori fyrirtækisins með því að haga sínum ákvörðunum gagnvart viðskiptavinum með þessum hætti.“

Stærsti hluthafi VÍS er Lífeyrissjóður verzlunarmanna og styður sjóðurinn Herdísi Fjeldsted sem er stjórnarformaður VÍS. Samkvæmt upplýsingum fréttastofu hefur lífeyrissjóðurinn lýst óánægju með arðgreiðsluna. Nokkrir stærstu hluthafar VÍS, meðal annars Lífeyrissjóður verzlunarmanna, ætla ekki að styðja tillögu um 5 milljarða arðgreiðslu óbreytta á aðalfundi VÍS hinn 17. mars næstkomandi. Hefur þessum upplýsingum verið komið á framfæri við fulltrúa þeirra í stjórn VÍS. Líklegast verður það niðurstaða stjórnarinnar að gera tillögu um hófstílltari arðgreiðslu.

Morgunblaðið greindi fyrst frá því í dag að stórir hluthafar VÍS hefðu efasemdir um arðgreiðsluna. Stöð 2 hefur heimildir fyrir því að búið sé að koma þeim upplýsingum til skila að þessi tillaga verði ekki studd óbreytt á aðalfundi VÍS.

Ekki eru uppi áform um að breyta tillögum um arðgreiðslur hjá TM og Sjóvá. Fyrirhuguð arðgreiðsla hjá Sjóvá er sett í einkennilegt ljós þegar haft er í huga að ríkissjóður er stærsti hluthafi Sjóvár með 13 prósenta eignarhlut gegnum SAT Eignarhaldsfélag hf.