Aukin harka hlaupin í deiluna í Straumsvík

Formaður verkalýðsfélagsins Hlífar segir að fara verði aftur til Bandaríkjanna í kringum árið 1930 til að finna svipaðar aðstæður og nú ríki í álverinu í Straumsvík. Verkfallsverðir stoppuðu yfirmenn sem reyndu að skipa út áli í morgun í trássi við útflutningsbann.

Útflutningsbann tók gildi í álverinu í Straumsvík á miðnætti úrskurð félagsdóms í gær um að sú aðgerð væri lögleg. Í morgun gengu síðan yfirmenn í álverinu í störf þeirra sem alla jafna skipa áli út frá fyrirtækinu.

Um tuttugu yfirmenn hófu að flytja ál á hafnarbakkann og byrjuðu síðan að hífa það um borð í skip við Straumsvíkurhöfn.

„Það var búið að senda okkar hafnarverkamenn heim af því Ísal taldi að þeir væru í verkfalli. Sem ég tel kannski skrýtið vegna þess að það hefði verið hægt að nýta starfsmennina til annarra starfa. Vegna þess að dómurinn sem féll í gær er bara um útflutningsbann á áli. Annað er hægt að vinna við,“ segir Kolbeinn Gunnarsson formðaur verkalýðsfélagsins Hlífar.

Verkfallsverðir þráttuðu við yfirmennina og forseti Alþýðusambandsins ásamt lögmanni sambandsins mættu á svæðið til að leggja þeim lið. Að lokum létu yfirmennirnir undan.

En hafið  þið náð að stoppa þetta varanlega, eða þurfið þið að standa vaktina á meðan á útflutningsbanninu stendur?

 „Ég tel að við séum búin að stoppa þetta núna varanlega. Þetta verði þá bara okkar menn sem komi annarri vöru um borð í skipið. En það verður ekki skipað út áli þessa dagana fyrr en niðurstaða liggur þá fyrir. En ég reikna með að þetta verði jafnvel að fara fyrir dóm aftur,“ segir Kolbeinn.

Verkalýðsfélagið telji að enginn nema forstjórinn og yfirmaður hafnarsvæðisins megi ganga í störf hafnarverkamannanna. En ljóst sé að tvær manneskjur ráði ekki við svo flókna útskipun.

„Aðrir stjórnendur eiga ekki að koma að þessari vinnu vegna þess að þá eru þeir að ganga inn í störf verkamanna hér við höfnina og það teljum við vera brot,“ segir formaðurinn.

Er þetta til marks um hörkuna í þessari deilu?

 „Manni sýnist það miðað við hvernig menn eru að stilla þessu upp hér, að þá held ég að við getum farið aftur til Bandaríkjanna árið 1930 og séð svona svipaðar aðstæður,“ segir Kolbeinn.

Samningafundur hófst hjá Ríkissáttasemjara klukkan eitt í dag og lauk án niðurstöðu nítíu mínútum síðar. En eftir átökin í Straumsvíkurhöfn er staðan í viðræðunum síst betri. Ólafur Teitur Guðnason upplýsingafulltrúi Ísal segir fyrirtækið bjóða sömu launahækkanir og aðrir hafi fengið og halda fast í meginkröfu sína um aukna verktöku.

„Á því máli, verktökumálinu, hefur öll þessi deila strandað, allan tímann.  Þar erum við einungis að fara fram á  sama rétt og öll önnur fyrirtæki hafa. Engin önnur fyrirtæki búa við neitt viðlíka hömlur og hvað þetta varðar. Þannig að okkar krafa er mjög sanngjörn og við bíðum eftir að  menn séu til viðræðu um hana,“ segir Ólafur Teitur.