Nýju vélarnar vísir á góða tíma í innanlandsfluginu

Flugvélin sem tekur við keflinu sem flaggskip innanlandsflota Flugfélags Íslands lenti í Reykjavík í fyrsta sinn í dag. Flugfélagsmenn sjá sóknarfæri með endurnýjun flugflotans.

Eftir að hafa notað fimmtíu sæta Fokker-vélar í hálfa öld var loks komið að því að Flugfélag Íslands kynnti stærri og hraðfleygari arftaka til sögunnar, kanadísku vélina Bombardier Q400. Hún flaug beint frá Englandi og renndi sér fyrst í hratt sýningarflug yfir Reykjavíkurflugvelli en svo voru hjólin sett niður og búist til lendingar.

Flugfélagið fær þrjár slíkar á næstu vikum sem leysa munu af fimm Fokkera, enda verða þessar með allt að 76 farþegasæti um borð og fljúga 30 prósentum hraðar en eldri vélar; ná 620 kílómetra hraða. Slökkvilið flugvallarins bauð upp á heiðursmóttöku, með því að mynda vatnsboga yfir vélinni, og starfsfólk Flugfélagsins og Icelandair fjölmennti til að fagna tímamótunum. 

„Þetta er stór stund hjá okkur hjá Flugfélaginu og fyrir innanlandssamgöngur í heild sinni,” sagði Árni Gunnarsson, framkvæmdastjóri Flugfélags Íslands.

„Þetta er mesta fjárfesting sem félagið hefur farið í gegnum á undanförnum tuttugu árum og vísir á góða tíma framundan og mikil tækfæri í þessari fjárfestingu.”

Á flugvellinum höfðu menn orð á því hversu hljóðlát vélin væri, þeirra á meðal ráðherra ferðamála, Ragnheiður Elín Árnadóttir, sem kvaðst varla hafa heyrt í henni þegar hún kom. 

„Ég held að þetta geti bara orðið til þess að setja allar deilur um Reykjavíkurflugvöll niður. Það mun enginn heyra í þessum vélum,” sagði ráðherrann og uppskar hlátur viðstaddra við athöfn í flugskýli Flugfélagsins eftir lendingu.

Nýjan vélin gefur Flugfélaginu færi á að bæta við tveimur nýjum áfangastöðum erlendis, Aberdeen í Skotlandi og Syðri-Straumfirði á Grænlandi.

Farþegum innanlands fjölgaði einnig í fyrra: „Og töluverð aukning það sem af er þessu ári,” segir Árni, sem kveðst sjá mikil tækifæri á innanlandsmarkaði, sérstaklega í fjölgun erlendra ferðamanna, sem nýti sér innanlandsflugið í vaxandi mæli. 

Eftir lendingu var rætt við flugstjórann, Jónas Jónasson, í þættinum Ísland í dag.