Marsspá Siggu Kling – Krabbi: Ekki miða þig við aðra

Elsku hjartans krabbinn minn. Það er svo dásamlegt hvað þú horfir bjartsýnum augum á lífið.

Alveg sama þó þú lendir í erfiðum aðstæðum, streitu eða annars konar erfiðleikum. Þú togarðu þig alltaf upp úr drullupollinum.

Skilaboðin til þín núna eru: Ekki miða þig við aðra. Það stoðar ekki neitt, þú ert einstakur og ekki líkur neinum öðrum.

Það er mikið að gera í kringum þig núna og alveg óteljandi verkefni því þú ert byrjaður að undirbúa þig undir sumarið alveg á fullu. Taktu bara eitt skref í einu þá yfirstígur þú þá erfiðleika sem eru í kringum þig. Ef þú ert í öllu í einu þá verður þú svo utan við þig og kemur ekki eins miklu í verk.

Það er eins og þú sért að fara fá einhver verðlaun eða viðurkenningu hvort sem það er fyrir vinnu, skóla eða einhvers konar keppni.

Þó að þú hafir ekki endilega mikinn tíma fyrir sjálfan þig á næstunni er uppskeran samt á leiðinni til þín og tíminn er blekking svo ekki vera að hafa áhyggjur af honum. Í ástinni þarft þú að leggja þig allan fram og vera svolítið á tánum og vanda þig því það fær þig til að geisla svo fallega.

Ekki taka ástinni eða hrifningu frá annarri manneskju sem sjálfsögðum hlut heldur gerðu eitthvað í því núna. Þetta á við þá sem eru í sambandi og þá sem eru á lausu.

Miðað við orkuna sem er í kringum þig núna þá gætir þú átt það til að hneyksla einhvern. En stundum þarf maður bara að láta hlutina gossa og segja það sem manni finnst. Ef allt verður vitlaust þá segir þú bara fyrirgefðu, því að máttur orða þinna verður sérstaklega mikill og það er eins og það séu ansi margir að hlusta á þig!

Það er álag í kringum þig en þetta álag á eftir að koma þér áfram því þegar allt er auðvelt þá er ekkert að gerast og úr því verður engin útkoma.

Þú færð óvenju mikið hrós fyrir það sem þú ert að gera og taktu vel eftir því og leggðu það á minnið fyrir hvað fólk er að hrósa þér. Ekki draga úr því í eitt augnablik þegar þú færð þannig skilaboð frá umheiminum og vertu athugull, því að skilaboðin eru send til þín í gegnum manneskjur sem segja jafnvel bara við þig eina setningu og hverfa svo á braut.

Öll afrek hefjast á þeirri ákvörðun að allavega reyna, og núna er rétti tíminn til þess. Þetta er það sem að skiptir öllu máli, elsku krabbinn minn.

Frægir krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari.