Lögregla leitar dökkklædds manns með svarta hanska og húfu

Lögreglan á höfuðborgarsvæðinu leitar að karlmanni sem var á ferli í Móabarði í Hafnarfirði um áttaleytið á mánudagsmorgun, 15. febrúar. Maðurinn tengist máli sem lörgegla hefur til rannsóknar.

Árni Þór Sigmundsson, aðstoðaryfirlögregluþjónn hjá lögreglunni á höfuðborgarsvæðinu, segir lögreglu engar nánari upplýsingar geta veitt um málið að svo stöddu vegna málsins.

Maðurinn, sem er um 180 sm á hæð og fölleitur, var dökklæddur, með svarta húfu og svarta hanska. Hann er talinn vera á aldrinum 35 – 45 ára. Þeir sem geta veitt upplýsingar um manninn og ferðir hans eru vinsamlegast beðnir um að hafa samband við lögreglu á skrifstofutíma í síma 444 1000.

Upplýsingum má einnig koma á framfæri á netfangið abending@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.