Þrefalt fleiri mæta í ræktina janúar en í desember

Líkamsræktarstöðvar landsins hafa gjarnan fyllst fyrstu vikurnar í janúar eftir að fólk strengir áramótaheit um heilbrigðari lífsstíl, og er árið 2016 engin undantekning. Framkvæmdastjórar líkamsræktarstöðva sem Markaðurinn ræddi við segjast nær allir finna fyrir mikilli fjölgun milli ára, mest var hún tæplega fjörutíu prósent.

Sala líkamsræktarkorta hjá Hress í janúar jókst um 12 til 15 prósent milli ára að sögn Lindu Hilmarsdóttur, eiganda og framkvæmdastjóra Hress. „Þetta gekk vonum framar. Vinsælust eru almennu kortin en það eru öll námskeið sem við erum með í boði að fyllast.“ Undir þetta tekur

Haraldur Dean Nelson, framkvæmdastjóri Mjölnis. „Það eru öll námskeið stútfull hjá okkur núna í janúar og komast færri að en vilja.“

Guðríður Erla Torfadóttir, framkvæmdastjóri Reebok Fitness, segir að nú þegar mælist 15 prósenta aukningu frá áramótum. Aukningin milli ára sé meiri núna í ár vegna þess að á sama tíma í fyrra var einungis ein stöð en nú eru þær þrjár.

Ágústa Johnson, framkvæmdastjóri Hreyfingar, segir að venjulega séu þrisvar sinnum fleiri mætingar í janúar en í desember. Á milli jóla og nýárs hafi allt farið af stað og var sala á námskeiðum um 25 prósentum meiri í desember 2015 en 2014. „Janúar lofar mjög góðu, það er kolbrjálað að gera í kortasölu, námskeiðasölu og einkaþjálfun.“ Ágústa áætlar að söluaukning á milli ára verði á milli 15 til 20 prósent í janúar.

Kjartan Már Hallkelsson, rekstrar­stjóri GYM heilsu, sem rekur tíu heilsuræktarstöðvar tengdar sundlaugum, segist ekki finna fyrir aukningu í janúar í ár samanborið við í fyrra. „Janúar er erilsamasti mánuður ársins, en desember hefur samt stækkað. Það eru færri að stoppa en ég myndi segja að janúar væri fimmtíu prósentum stærri en desember.“

Þröstur Jón Sigurðsson, eigandi Sporthússins, segir að fyrsta vikan í ár hafi verið mun stærri en sama vika í fyrra, bæði í Kópavogi og Reykjanesbæ. „Aukningin í Kópavogi var 39 prósent (en þar spilar vissulega inn að BootCamp er komið til okkar en var ekki í tölunum í fyrra) og í Reykjanesbæ var aukningin 17 prósent.“