Nýr starfsmaður og framkvæmdastjóri hjá Opnum kerfum

Gunnar Haukur Stefánsson hefur hafið störf hjá Opnum kerfum sem forstöðumaður verkefnastýringar- og viðskiptaþróunar. Gunnar Haukur er rafmagnsverkfræðingur frá Háskóla Íslands og er með meistaragráðu í verkefnastjórnun.

Gunnar starfaði áður hjá Meniga þar sem hann stýrði teymi verkefnastjóra og hugbúnaðarsérfræðinga við stækkun félagsins, innleiðingu og þróun á vöruframboði þess í Evrópu og Ástralíu.  Gunnar hefur viðamikla þekkingu og reynslu á UT markaðnum og hefur m.a. starfað í viðskiptagreiningu og þróun fyrir nýja Landsbankann, stýrt hugbúnaðarsérfræðingum gamla Landsbankans, starfað sem sérfræðingur í vöruþróun og hópstjóri hjá Teamware, Dímon hugbúnaðarhúsi og Flögu.

Nýr framkvæmdastjóri sölu- og markaðssviðs Opinna kerfa

Sigurgísli Melberg hefur tekið við sem framkvæmdastjóri sölu- og markaðssviðs hjá Opnum kerfum. Sigurgísli er með MSc í stjórnun og stefnumótun frá Háskóla Íslands og BSc í rekstrarhagfræði frá háskólanum í Aalborg Danmörku.

Sigurgísli hefur starfað  hjá Opnum kerfum síðan árið 2014, síðast sem forstöðumaður notendalausna. Hann var áður rekstrarráðgjafi hjá Provis ráðgjöf, sölu- og markaðsstjóri BT og vörustjóri hjá Merlin A/S í Danmörku.