Árinu 2016 stungið í samband upp í fjalli

„Þetta er besta útsýnið yfir bæinn. Þú ert að minnsta kosti ekki með hálsríg að horfa á flugeldana,“ segir Ragnar Högni Guðmundsson, meðlimur í björgunarsveitinni Erni í Bolungarvík.

Ragnar hefur síðastliðin átta ár, ásamt unglingadeild björgunarsveitarinnar, séð um ljósaskilti í hlíðum Traðarhyrnunnar sem skiptir um ártal á miðnætti um áramót. Fjallshlíðin er frekar brött svo það er töluvert basl að komast upp.

„Við förum upp seinnipart dags á gamlársdag og setjum skilti þess árs upp. Það er knúið með ljósavél. Svo förum við aftur upp á miðnætti, fyllum vélina og látum hana ganga þar til hún verður bensínlaus. Svo fara allir að sofa og hún deyr bara einhvern tíma undir morgun,“ segir Ragnar.

Skiltið sjálft er heimatilbúið ef svo má segja. Ártalið er stafað með jólaljósaseríu á stálgrind og á miðnætti er liðnu ári kippt úr sambandi og hið nýja ár gengur í garð þegar því er stungið í samband við fjöltengi. Ragnar segir að sami háttur hafi verið á í ár.

Það er snjóþungt í Bolungarvík, nyrsta bæ Vestfjarðarkjálkans, og niðamyrkur þegar hópurinn leggur af stað á fjallið þegar miðnætti nálgast. „Ég held að það hafi einu sinni komið fyrir hjá mér að við höfum þurft að kveikja á nýárskvöldi. Þá þurfti að fresta áramótunum um sólarhring vegna veðurs,“ segir Ragnar.

Árið 2011 voru vígðir snjóflóðavarnargarðar í Traðarhyrnunni sem ekki komu í veg fyrir að skiltið væri sett upp. „Við höfum í raun farið upp á keilurnar sem eru fyrir ofan varnargarðinn. Það er í ágætis hæð. Það er ákveðin stemning að hópurinn fari saman upp í fjall. Þú ert kominn upp í þá hæð sem flugeldarnir eru að springa og horfir beint inn í þá, sem er mjög gaman og öðruvísi.“

Að sögn Ragnars hófst siðurinn um aldamótin síðustu, og hefur haldist með smá hléum.