Enn þynnist hópurinn hjá Degi

Dagur Sigurðsson, þjálfari þýska landsliðsins í handbolta, fékk slæmar fréttir í gær þegar tilkynnt var að enn einn leikmaður þýska æfingarhópsins væri meiddur.

Leikmaðurinn sem um ræðir er vinstri hornamaðurinn Michael Allendorf sem leikur með Melsungen í þýsku deildinni í handbolta.

Var honum var ætlað að fylla í skarð Uwe Gensheimer sem missir af mótinu vegna meiðsla en flautað verður til leiks á EM í Póllandi þann 15. janúar næstkomandi.

Allendorf er fjórði leikmaðurinn sem neyðist til þess að draga sig úr landsliðshópnum en þegar höfðu liðsfélagarnir úr Rhein-Neckar Löwen, Gensheimer og Patrick Grötzki og Patrick Wiencek, leikmaður Kiel, neyðst til þess að draga sig úr landsliðshópnum vegna meiðsla.