Svipuð sala hjá Landsbjörg og í fyrra

Flugeldasala Slysavarnafélagsins Landsbjargar gekk vel fyrir áramótin og bendir allt til þess að salan hafi verið svipuð og í fyrra. Sölustjóri Landsbjargar segir að sala á skotkökum hafi aukist lítillega á milli ára.

Flugeldasalan er ein mikilvægasta fjáröflunarstarfsemi björgunarsveitanna og stendur undir stórum hluta af rekstri þeirra yfir árið. Jón Ingi Sigvaldason, markaðs- og sölustjóri hjá Landsbjörg, segir að salan í ár hafi verið svipuð og í fyrra.

„Heilt yfir sýnist mér salan hafa gengið mjög vel,“ segir Jón. „Það sem við komumst eiginlega að í ár er að það hefur aldrei verið eins mikil dreifing á vöruflokkum. Það kom okkur reyndar á óvart í fyrra hvað stóru kökurnar seldust mikið. Það heldur áfram en við getum ekki sagt að eitthvað eitt hafi selst meira en annað.“

Flugeldamarkaðir verða opnaðir á ný á þrettándanum en Jón segir að þá sé fólk aðallega að kaupa minni hluti.