Hinn ökumaðurinn slasaðist ekki alvarlega

Áreksturinn á Hrútafjarðarhálsi í gærkvöldi var milli tveggja fólksbíla sem enduðu báðir utan vegar. Ekki er mikið hægt að segja um hvernig áreksturinn bar að.

Samkvæmt upplýsingum frá lögreglunni á Blönduósi var ein manneskja í hvorum bíl. Líkt og greint hefur verið frá, slasaðist kona nokkuð illa í árekstrinum og var hún flutt með þyrlu á Landspítalann í Reykjavík. Þar er henni haldið sofandi í öndunarvél á gjörgæslu.

Hinn ökumaðurinn var fluttur á Hvammstanga til skoðunar en áverkar hans eru sagðir minniháttar, þó áreksturinn hafi verið alvarlegur. 

Lögreglan hefur unnið á vettvangi í dag og búið er að fjarlægja báða bílana.