Skjálfti í tölvuleikjasnillingum landsins

Mikil spenna ríkir nú meðal tölvuleikjaspilara en á morgun hefst sjálft Íslandsmeistaramótið – Tuddinn 2016 en þar er keppt í Counter-Strike:GO og League of Legends. Rúmlega 240 keppendur berjast um að verða krýndir sigurvegarar, en allar helstu kempur landsins á þessu sviði munu takast á, að sögn sérfræðings Vísis í tölvuíþróttum. Liprustu fingur landsins munu leika um lyklaborðið og/eða fitla við músina.

„Til mikils að vinna þar sem að sigurlið CSGO keppninnar fær ferð til Danmerkur á Copenhagen Games í vor og fá þar með tækifæri á því að spreyta sig á erlendri grundu,“ segir Ólafur Nils Sigurðsson.

Ljóst er að verulegur skjálfti er í mannskapnum enda hafa töluverðar hræringar hafa átt sér stað í Íslenskum liðum frá seinasta móti. Vísir fékk Ólaf Nils til að renna yfir stöðuna eins og hún blasir við í dag. Hvaða lið eru líklegust?

„Malefiq léku til úrslita í netdeild Tuddans og sigruðu þar seven en þar fór Páll Sindri ‚pallib0ndi‘ fyrir sínum mönnum og unnu þeir öruggan 2-0 sigur. Þeir hafa þó skipt út einum leikmanni og það verður fróðlegt hvort að þeim tekst að sigra um helgina,“ segir Ólafur Nils.

Seven léku einnig til úrslita í netdeild Tuddans og töpuðu þar fyrir Malefiq. „En eftir úrslitin urðu miklar mannabreytingar í liðinu og losuðu þeir sig við þrjá leikmenn og fengu inn þrjá nýja, landsliðsmennina Ólaf ‚ofvirk‘, Kristján ‚kruzer‘ og Pétur ‚peterr‘. Margir telja að þetta nýja lið sé afar sigurstranglegt.“

Þar höfum við það. Annað lið sem Ólafur Nils nefnir til sögunnar er Skaði, lið sem var eitt af þeim bestu á Íslandi þar til að í fyrra að stór hluti liðsins gekk til liðs við seven. „En eftir að samning þeirra við seven var sagt upp þá tóku þeir sig til og endurstofnuðu Skaða. Þarna eru margir reyndir leikmenn á ferð sem að eflaust langar gríðarlega að ná fram hefndum gegn fyrrum liðsfélögum sínum.“

Að endingu nefnir Ólafur Nils VECA til sögunnar: „Hafa verið á jaðrinum að vera í titilbaráttum á Íslandi en aldrei náð að sigra. Þeir fengu til sín tvo reynda leikmenn nýverið og það gæti verið að það verði til þess að þeir nái loksins að sigra mót.“

Mótið fer fram í húsnæði Símans við Stórhöfða 22 og stendur yfir alla helgina. Nánar um mótið er hér.