Milljón króna styrkur frá Skyrgámi

Grýla og synir hennar mættu á skrifstofu Hjálparstarfs kirkjunnar í gær með 960 þúsunda króna framlag Skyrgáms og bræðra hans til verkefna stofnunarinnar.

Í fréttatilkynningu frá Hjálparstarfinu segir að jólasveinana dreymi um að komast í landsliðin í handbolta og fótbolta fyrir Evrópumótin sem fram undan eru en Grýla hafi meiri trú á íþróttafólki framtíðarinnar. Hluti framlagsins rennur þess vegna í Hemmasjóð Hjálparstarfsins en úr honum fá efnalitlar fjölskyldur á Íslandi styrk til að greiða æfingagjöld og fleira tengt íþróttaiðkun barna og unglinga.

Jólasveinaþjónusta Skyrgáms hefur frá stofnun látið 20% af veltu sinni renna til Hjálparstarfs kirkjunnar. Heildarframlag er tæpar 11 milljónir króna og hefur því verið varið til að aðstoða einstaklinga í verkefnum bæði innan lands og utan. Á síðasta ári var gjöf Skyrgáms nýtt til að gera fræðsluefni um Hjálparstarf kirkjunnar með það að markmiði að gera fólk meðvitaðra um þörf náungans og hið faglega starf sem hjálparstarfið vinnur með þeim sem standa höllum fæti.

Kristín Ólafsdóttir, upplýsingafulltrúi Hjálparstarfsins, kveðst þakklát fyrir framlag Grýlu og strákanna hennar.