Framleiðslufyrirtæki Hross í oss gjaldþrota

Framleiðslufyrirtækið Hrossabrestur ehf, sem framleiddi kvikmyndina Hross í oss, hefur verið tekið til gjaldþrotaskipta. Fyrirtækið er í eigu Benedikts Erlingssonar, leikstjóra og handritshöfundar kvikmyndarinnar, og Friðriks Þórs Friðrikssonar, framleiðanda hennar.

Kvikmyndin var seld til fleiri en þrjátíu landa og hlaut um tuttugu verðlaun á alþjóðlegum kvikmyndahátíðum. Hér heima fyrir hlaut myndin sex Edduverðlaun, meðal annars fyrir bestu kvikmynd, og var valin sem framlag Íslands til Óskarsverðlaunanna.

Í viðtali við Friðrik Þór árið 2014 kom fram að Hross í oss hefði samtals fengið yfir tíu milljónir króna í verðlaunafé, en um helmingur þess fjár rynni þó til dreifingaraðila.