Tókst að lenda sama geimfarinu á jörðinni í annað sinn

Blue Origin, geimferðafyrirtæki Jeff Bezos, hefur í annað sinn náð að lenda geimfari heilu og höldnu á jörðinni. Geimfarið, sem er hannað til að bera sex manneskjur, náði tæplega 102 kílómetra hæð áður en það snéri aftur til jarðar. 

Um er að ræða sama farið og fyrirtækinu tókst á síðasta ári að fljúga af stað og lenda, samkvæmt Bezos. Hann segir í tilkynningu á vefsíðu fyrirtækisins að unnið sé að því að byggja geimfar sem kemst á sporbraut um jörðu en farið sem nú er í notkun er ekki nógu öflugt.

Blue Origin er eitt örfárra fyrirtækja sem vinnur að því að hanna og framleiða geimför sem geta farið í fleiri en eina ferð, fram og til baka frá jörðinni. 

SpaceX, fyrirtæki rafbílamógúlsins Elon Musk, er líklega þekktasta fyrirtækið sem vinnur að þessu markmiði en geimfar félagsins sprakk í síðasta mánuði þegar einn af lendingarfótum þess gaf sig þegar flauginni var lent. 

Myndband frá Blue Origin um lendinguna: