Stærsta gestabók í heimi á Háskóladeginum

Í dag fer fram Háskóladagurinn, árlegur viðburður þar sem Háskóli Íslands, Háskólinn í Reykjavík og Listaháskóli Íslands verða með opið hús fyrir alla landsmenn þar sem starfsemi háskólanna er kynnt á fjölbreyttan hátt. Meðal þess sem hægt verður að sjá er stærsta gestabók í heimi.

Mikið verður um að vera í dag og verður Háskóli Íslands með opið hús frá 12-16 í dag þar sem landsmönnum öllum er boðið að taka þátt í viðburðum og uppákomum sem sýna nýsköpun og vísindi í litríku og lifandi ljósi.

Gestir geta skoðað rannsóknastofur, tæki, búnað og húsakynni. Á staðnum verða bæði vísindamenn, kennarar og nemendur úr öllum deildum háskólans sem svara þeim spurningum sem brenna á gestum um allt milli himins og jarðar.

Háskólinn í Reykjavík og Háskólinn á Bifröst verða með námskynningar í húsakynnum Háskólans í Reykjavík við Öskjuhlíð og Listaháskóli Íslands kynnir allar sínar námsleiðir í sínum húsakynnum á Laugarnesvegi. Boðið er upp á ókeypis strætóferðir á milli skóla.

Þá munu Háskólinn á Akureyri, Háskólinn á Hólum, Landbúnaðarháskóli Íslands á Hvanneyri verða með kynningu á starfsemi sinni á 1. hæð Háskólatorgs

Drekar, gestabækur og kappakstursbílar

Það ætti hver að geta fundið sitt við hæfi á Háskóladeginum enda er dagskráin fjölbreytt. Ber helst að nefna að félagar úr Sprengjugengi Háskóla Íslands munu halda sýningu í sal 1 í Háskólabíói klukkan 13 og 14.30.

Hugvísindasvið Háskóla Íslands mun gefa gestum kost á að grafa eftir fornminjum auk þess sem að kínverskur dreki mun liðast um tröppur aðalbyggingu Háskóla Íslands. 

Á Háskólatorgi verður stærsta gestabók heimsins og í Öskju verður hægt að berja augum glæsilegan rafknúinn kappastursbíl sem verkfræðinemar í Háskóla Íslands í liðinu Team Spark hafa hannað.

Frekari upplýsingar um dagskrá Háskóladagsins má nálgast hér.