Enn von um oddaleik þrátt fyrir risasigur í fyrsta leik

KR-ingar unnu 30 stiga sigur á Haukum í gærkvöldi í fyrsta úrslitaleik liðanna um Íslandsmeistaratitilinn í Domino´s deild karla í körfubolta. Þetta er ekki fyrsta úrslitaeinvígið sem byrjar á skelli.

Þrisvar sinnum áður hefur lið unnið stærri sigur í leik eitt í lokaúrslitum og í tveimur þeirra voru það líka Haukar sem fengu skellinn.

Metið er síðan 1986 þegar Njarðvíkingar unnu 41 stigs sigur á Haukum í fyrsta leik, 94-53. Njarðvíkingar tryggðu sér síðan Íslandsmeistaratitilinn með tveggja stiga sigri í Strandgötu í næsta leik en í þá daga þurfti bara að vinna tvo leiki.

Það er ekki útilokað að þetta einvígi fari alla leið í oddaleik ef marka má söguna. Njarðvíkingar unnu nefnilega 37 stiga sigur á Keflavík í fyrsta leik lokaúrslitanna 1991 en úrslitin réðust ekki fyrr en í oddaleik þar sem reyndar Njarðvíkingar höfðu betur.

Þetta eru önnur lokaúrslitin í röð sem Haukar byrja á skelli en þeir töpuðu með 36 stigum á móti Keflavík þegar þeir voru síðast í úrslitaeinvíginu fyrir 23 árum eða vorið 1993. Keflavík vann þá úrslitaeinvígið á endanum 3-0.

Þetta er ennfremur í annað skiptið sem KR-ingar vinna 30 stiga sigur í fyrsta leik í lokaúrslitum en því náðu þeir einnig á móti Stjörnunni í úrslitaeinvíginu 2011. Stjarnan jafnaði þá metin í leik tvö en KR vann einvígið á endanum 3-1.

Það hefur aðeins tveimur liðum tekist að vinna titilinn eftir tuttugu stiga tap í fyrsta leik en þau töpuðu með 20 eða 21 stigi. Það eru lið Haukar frá 1988 og lið lið KR frá 2007.

Haukar fengu nefnilega 20 stiga skell í fyrsta leik í Njarðvík þegar þeir unnu Íslandsmeistaratitilinn í fyrsta og eina skiptið fyrir 28 árum síðan. Haukar svöruðu með 6 stiga sigri á heimavelli sínum og tryggðu sér síðan sigurinn í tvíframlengdum leik í Ljónagryfjunni í Njarðvík.



Stærstu sigrar í fyrsta leik í úrslitaeinvígi um Íslandsmeistaratitil karla

41 stig

Lokaúrslit 1986

Njarðvík-Haukar 94-53

(Njarðvík vann 2-0)

37 stig

Lokaúrslit 1991

Njarðvík-Keflavík  96-59

(Njarðvík vann síðan 3-2)

36 stig

Lokaúrslit 1993

Keflavík-Haukar 103-67

(Keflavík vann síðan 3-0)

30 stig

Lokaúrslit 2011

KR-Stjarnan 108-78

(KR vann síðan 3-1)

30 stig

Lokaúrslit 2016

KR-Haukar 91-61

24 stig

Lokaúrslit 2001

Njarðvík-Tindastóll 89-65

(Njarðvík vann síðan 3-1)

24 stig

Lokaúrslit 2013

Grindavík-Stjarnan 108-84

(Grindavík vann síðan 3-2)

22 stig

Lokaúrslit 1992

Keflavík-Valur 106-84

(Keflavík vann síðan 3-2)

21 stig

Lokaúrslit 2002

Keflavík-Njarðvík 68-89

(Njarðvík vann síðan 3-0)

21 stig

Lokaúrslit 2007

Njarðvík-KR 99-78

(KR vann síðan 3-1)

20 stig

Lokaúrslit 1988

Njarðvík-Haukar 78-58

(Haukar unnu síðan 2-1)