Tækifærin í markaðssetningu raforku

Framtíðin er full af spennandi tækifærum og það er undir okkur öllum komið hvernig við nýtum þau. Það er raforkumarkaður ekki undanskilinn, þó svo hann hafi hingað til verið nokkuð einsleitur. Framleiðsla á hreinni orku hér á landi mun til lengri tíma skapa þjóðarbúinu miklar tekjur og um leið gefa Íslendingum tækifæri til að hafa gífurleg áhrif á alþjóðavísu.

Sem fyrr segir hefur raforkumarkaður verið einsleitur hingað til, bæði hér á landi og erlendis. Einstaklingar og fyrirtæki hafa keypt orku af opinberum fyrirtækjum og borgað rafmagnsreikninginn án þess að spyrja margra spurninga – eða það sem verra er, að lengi vel var ekki val um annað. Helstu samskipti orkufyrirtækja og neytenda hafa hingað til verið mánaðarlegur reikningur fyrir áætlaðri notkun.

Orka sem söluvara

Þetta er þó að breytast hratt og með samkeppni á markaði og sífellt breytilegri tækni hafa einstaklingar og fyrirtæki loks val um hvaðan og hvernig þau kaupa raforku. Samhliða aukinni þörf og kröfu um vistvæna orku eru neytendur meðvitaðir um þörfina fyrir aukin gæði, betri þjónustu og samkeppnishæf verð. Þeir söluaðilar raforku sem mæta þessum þörfum munu vinna markaðinn, ef þannig má að orði komast. Þeir aðilar munu ná árangri með vörumerkjafræðina (e. branding) að vopni.

Rafmagn er í raun hrávara sem gengur kaupum og sölum. Hægt er að gefa orkunni þýðingu sem skiptir neytendur máli. Því skiptir vörumerkja­stjórnun máli þegar neytendur geta í auknari mæli valið hvaðan þeir kaupa orkuna. Við þekkjum öll heimsfræg vörumerki á borð við Apple, Google og Amazon. Ekkert þessara fyrirtækja fann upp nýja vöru þannig séð. Tölvur voru til áður en Apple fór að framleiða sínar tölvur og Google var ekki fyrsta leitarvélin svo tekin séu dæmi. Þrátt fyrir það hafa þessi vörumerki ákveðna þýðingu í hugum okkar og vörumerkið eitt og sér kemur ákveðnum skilaboðum áleiðis til neytenda. Skilaboðum sem fela í sér gæði, verð og tilfinningu. Það sama mun gerast hjá þeim rafmagnsveitum sem tileinka sér öfluga vörumerkjastjórnun.

Fyrsta skrefið

Dagana 19. og 20. september næstkomandi verður haldin hér á landi ráðstefna um markaðssetningu raforku. Ráðstefnan er sú fyrsta sinnar tegundar í heiminum en þar koma saman margir af stærstu og mikilvægustu söluaðilum raforku í heiminum. Meðal ræðumanna eru aðilar sem hafa yfirburðaþekkingu á viðfangsefninu, þ.e. raforkumarkaði sem og vörumerkjastjórnun. Þátttakendur ráðstefnunnar hafa um leið tækifæri til að mynda öflugt tengslanet í geiranum og sækja sér þekkingu.

Markaðssetning á raforku er nær óþekkt hugtak á alþjóðavísu og ráðstefnan er því um leið mikilvægur frumkvöðlavettvangur. Hún vekur einnig athygli á Íslandi, hreinleika landsins við framleiðslu á raforku, þeim tækifærum sem til staðar eru í íslensku viðskiptalífi og síðast en ekki síst þeirri þekkingu og reynslu sem er til staðar hér á landi hvort sem litið er til orkugeirans, akademíunnar eða viðskiptalífsins í heild sinni. Þarna verða stigin fyrstu skrefin í því að nýta tækifæri framtíðarinnar.