Dr. Luke neitar ásökunum Keshu um nauðgun

Bandaríski upptökustjórinn Dr. Luke hefur tekið til varna á Twitter eftir að tónlistarkonan Kesha sakaði hann um kynferðislegt og andlegt ofbeldi.

Í síðustu viku neitaði dómstóll í New York Keshu um bráðabirgða lögbann sem hefði heimilað henni að skapa tónlist utan við sex plötu samninginn sem hún er með við útgáfu Dr. Luke, Kemosabe Records, sem er dótturfyrirtæki Sony.

Stefna hennar gegn Dr. Luke er þó enn fyrir dómi, sem og mótstefna Dr. Luke gegn henni.

Shirley Kornreich var dómarinn í máli Keshu gegn Kemosabe Records en hún sagði að það væri afar sjaldgæft að verða við kröfu um lögbann í samningsmálum og það hefði orðið afar óvenjulegt úrræði, að því er fram kemur á vef bandarísku fréttastofunnar CNN.

Margir þekktir  tónlistarmenn hafa lýst yfir opinberum stuðningi við Keshu, þar á meðal Lady Gaga, Kelly Clarkson og Demi Lovato.

Tónlistarkonan Taylor Swift gaf Keshu 250 þúsund dollara, sem nemur um 32 milljónum íslenskra króna, á sunnudag til að létta undir með henni vegna kostnaðar við dómsmálin.

Kesha höfðaði mál gegn Dr. Luke í Los Angeles árið 2014 þar sem hún sakaði hann um kynferðislegt, líkamlegt og andlegt ofbeldi.

Í stefnunni sagði hún Dr. Luke, sem heitir réttu nafni Lukasz Gottwald, um að hafa gefið henni eiturlyf sem urðu til þess að hún missti meðvitund. Sakar hún Dr. Luke um að hafa nýtt sér ástand hennar í framhaldinu og nauðgað henni.

Í gærkvöldi sagði hann á Twitter að hann hefði hvorki nauðgað Keshu né haft samræði við hana. „Kesha og ég vorum vinir í mörg ár og ég leit á hana sem litlu systir mína,“ sagði Dr. Luke á Twitter.

Hann minntist á vitnisburð Keshu frá árinu 2011 þar sem hann sagði hana hafa viðurkennt að nauðgunin hefði aldrei átt sér stað.

Kesha hefur haldið því fram að Dr. Luke hefði hótað henni ofbeldi ef hún myndi ekki ljúga við réttarhöldin árið 2011.