The Color Run og Alvogen úthluta 6 milljónum króna í góðgerðamál

Samfélagssjóður The Color Run og lyfjafyrirtækisins Alvogen hefur úthlutað styrkjum til tveggja íslenskra góðgerðarfélaga í tengslum við litahlaupið sem haldið verður í miðbæ Reykjavíkur í sumar.

Sex milljónum króna er úthlutað til Styrktarfélags lamaðra og fatlaðra og Rauða krossins vegna verkefna sem tengjast réttindum og velferð barna á Íslandi. Samfélagssjóðurinn var stofnaður á síðasta ári þegar The Color Run var haldið í fyrsta sinn hér á landi og þá hlutu UNICEF, Rauði krossinn og Íþróttasamband fatlaðra styrk úr sjóðnum.

Í Reykjadal vinnur Styrktarfélag lamaðra og fatlaðra að endurnýjun húsnæðis en árlega koma um 300 fötluð og langveik börn til sumar- og helgardvalar. Reykjadalur gefur börnum og ungmennum sem þurfa sérstaka þjónustu vegna fötlunar tækifæri til að komast í sumarbúðir líkt og stendur jafnöldrum þeirra til boða. Styrkurinn verður notaður í uppbyggingu á nýjum litagarði með litríkum leiktækjum í hjarta svæðisins.

Rauði krossinn hóf kynningarátak á síðasta ári gegn fordómum í íslensku samfélagi undir nafninu „Vertu næs“ og samfélagssjóður The Color Run og Alvogen hefur ákveðið að styðja áfram við þetta þarfa verkefni. Áfram verður unnið að vitundarvakningu um fjölmenningarsamfélag á Íslandi sem tekur á fordómum gagnvart uppruna fólks, kynþætti eða litarhafti.

„Það er gleðiefni að geta veitt sumarbúðunum í Reykjadal stuðning og efla þannig enn frekar gott starf sem þar hefur verið unnið. Samstarf okkar við Rauða krossinn hefur verið farsælt undanfarin ár og mikilvægt að samtökin geti haldið áfram að stuðla að umræðu og fræðslu um fordómalaust samfélag,“ segir Róbert Wessmann, forstjóri Alvogen.

Davíð Lúther Sigurðarson, framkvæmdastjóri The Color Run á Íslandi, segir að það sé forsvarsmönnum litahlaupsins mikilvægt að láta gott af sér leiða til samfélagsins með þessum hætti. „Þrátt fyrir að The Color Run sé ekki skilgreint sem góðgerðarhlaup þá lætur það samt gott af sér leiða. Okkur er sönn ánægja að styðja við svona flott málefni hér á landi.”