Þrefaldaðist að stærð á fáeinum mánuðum

Eftirspurnin eftir atvinnuhúsnæði er að aukast, segir Garðar Hannes Friðjónsson, forstjóri fasteignafélagsins Eikar. Hann segist hafa talið 80-85 þúsund fermetra lausa haustið 2013. „Við teljum það vera komið niður í 65-70 þúsund núna einu og hálfu ári síðar,“ segir Garðar. Þetta sé vegna meiri mannfjölda, lækkandi atvinnuleysis og fleira fólks á atvinnualdri. Fólki sem þarf atvinnuhúsnæði er því að fjölga.

Þegar ársreikningur Eikar fyrir árið 2014 var kynntur kom um leið fram að félagið yrði skráð á markað. Eik fasteignafélag stefnir á að skrá hlutabréf félagsins í Kauphöll í apríl, að undangengnu útboði.

Garðar Hannes Friðjónsson, forstjóri Eikar, hefur fylgt Eik frá upphafi en félagið var stofnað árið 2002. „Á árunum 2003-2006 óx félagið hratt með kaupum á eignum,“ segir Garðar og bætir við að eftir það hafi félagið hægt á vextinum þar sem það var komin ákveðin stígandi í markaðinn og verktakar farnir að sýna þessum geira áhuga,“ segir Garðar.

Árið 2011 komu nýir eigendur að félaginu sem tóku ákvörðun um að styrkja efnahag félagsins og stækka með það að markmiði að skrá félagið á hlutabréfamarkað. Félagið endurfjármagnaði allar skuldir sínar, meðal annars með því að gefa út skuldabréfaflokk skráðan í Kauphöll. Félagið hélt áfram að byggjast upp jafnt og þétt með kaupum á einstaka eignum en á árinu 2013 var ákveðið að stækka félagið allverulega með kaupum á fasteignafélaginu EF1 sem á Turninn í Kópavogi og fasteignafélaginu Landfestum sem á mikið af skrifstofuhúsnæði í Borgartúninu og Ármúlanum. „Það var mikið ferli sem tók langan tíma og lauk í raun ekki fyrr en um mitt ár 2014. Í dag á félagið gott, arðbært og vel staðsett safn fasteigna og því telur stjórn félagsins þetta vera rétta tímann til að óska eftir skráningu í Kauphöllina,“ segir Garðar Hannes í samtali við Markaðinn.

Við kaupin á EF1 og Landfestum stækkaði efnahagsreikningur Eikar úr 22-23 milljörðum í um það bil 66 milljarða. Garðar segir að félagið leggi nú áherslu á arðsemi og þjónustu við hluthafa, fremur en frekari stækkun. „Stjórn hefur sett sér arðgreiðslustefnu um að greiða árlega út arð sem nemur 35% af handbæru fé frá rekstri . Það skiptir máli að fjárfestar viti hver markmið félagsins eru,“ segir Garðar.