Svartamarkaðsbrask með miða á landsleikinn blómstrar

Á netmarkaðstorginu Bland eru miðar á landsleik Íslands og Kasakstan á sunnudaginn komnir upp í 25 þúsund krónur síðast þegar spurðist og fer verð hækkandi.

Þjóðin er varla búin að jafna sig eftir glæstan sigur gegn Hollendingum í gær; en strax á sunnudag er leikur á Laugardagsvelli í riðlakeppni EM. Ísland – Kasakstan. Þar ræðst að öllum líkindum hvort Íslendingar komast í úrslitakeppnina sjálfa. Löngu er uppselt á leikinn og stefnir í mikla stemmningu. Þetta er stemmning sem margir vilja upplifa. Eftirspurn er því mikil eftir miðum á leikinn og þá blómstrar hinn svarti markaður.

Varað við útprentuðum E-miðum

Jóhann G. Kristinsson er vallarstjóri á Laugardalsvelli og þar stendur mikið til. Hann segir að aukin öryggisgæsla verði á vellinum, 130 manns að minnsta kosti og þá var verið að taka í notkun nýja miðaskanna í stúku austur, stúkan með bláu sætunum, sem á að veita aukið öryggi og skilvirkni. Að sögn Jóhanns hafa þeir ekki lent í því að þurfa að stöðva fólk með falsaða miða en þeir vara engu að síður við því að fólk kaupi útprentaða E-miða.

Fáir frá Kasakstan væntanlegir

Sætin á Laugardalsvellinum eru rúmlega 9.700, og var uppselt klukkutíma eftir að opnað var fyrir miðasölu fyrir um hálfum mánuði. Athyglisvert er að Kasakstanir nýttu sér ekki þá miða sem þeim eru ætlaðir í almennri sölu. Erlend lið eiga rétt á 1050 miðum en í þessu tilfelli var það ekki nýtt. „Þeir eiga alltaf hundrað miða í VIP, eða í betri aðstöðu, en þeir nýttu ekki þessa 1050 miða. Þetta eru þrjú hólf í minni stúkunni, alltaf verið þar í endanum en nú eru Íslendingar í öllum. Fleiri Íslendingar sem njóta en vanalega, að koma á völlinn,“ segir Jóhann. „Það verður gaman ef við vinnum og gerum þetta með stæl. Okkar menn eru til alls líklegir og hafa sannað það, svo um munar.“

Engin sala fyrir utan leikvanginn

Eins og áður sagði hafa þeir á Laugardalsvelli ekki lent í því að þurfa að vísa fólki frá vegna falsaðra miða en allur er varinn þó góður. Þá hefur ekki myndast hefð fyrir því, að sögn Jóhanns, að menn komi sér fyrir utan leikvangs og falbjóði miða eins og víða þekkist erlendis. Helst að það komi þar fólk sem ekki getur nýtt sinn miða og vill losa sig við hann, og fátt eitt við það að athuga.