SVT: Brýnt að verðlagning mjólkur lúti sömu lögmálum og aðrar vörur

Samtök verslunar og þjónustu gagnrýna og lýsa miklum vonbrigðum með þá ákvörðun verðlagsnefndar búvara að hækka heildsöluverð á mjólk og mjólkurafurðum frá og með 1. ágúst næstkomandi.

Samtökin segja afar brýnt að verðlagning mjólkur og mjólkurvara lúti sömu lögmálum og verðlagning annarar vöru.

Í yfirlýsingu frá samtökunum segir að ákvörðunin komi á afar viðkvæmum tíma í kjölfar erfiðra kjarasamninga og markmið þeirra sé að færa launafólki í landinu verulega kaupmáttaraukningu.

„Forsendan fyrir því að það markmið náist er að unnt verði að halda aftur af hækkunum á vöru og þjónustu. Sú hækkun sem nú hefur verið ákveðin á þeirri nauðsynjavöru sem mjólk og mjólkurvörur eru, er til þess fallin að tefla í tvísýnu að markmið kjarasamninganna náist, sérstaklega sker í augu sú gífurlega hækkun sem hefur verið ákvörðuð á smjöri, eða um 11,6%.

Það er einnig afar óheppilegt þegar svo langt líður á milli verðbreytinga á mjólk, en síðasta breyting átti sér stað 1. október 2013. Áhrif slíkra breytinga verða mun meiri en ella þegar svo langt líður á milli.

Þessi ákvörðun varpar þó fyrst og síðast ljósi á það sérstaka kerfi sem notað er til að ákvarða heildsöluverð á mjólk, þar sem það er á valdi opinberrar nefndar að ákvarða slíkt. Að mati samtakanna er brýnt að verðlagning þessarar vöru lúti sömu lögmálum og verðlagning annarrar vöru,“ segir í yfirlýsingunni.